المستدرك على الصحيحين

حیان بن عمیر، سیدنا عبدالرحمن بن سمرہ رضی اللہ عنہ سے روایت کرتے ہیں، انہوں نے فرمایا: اسی دوران کہ میں تیر اندازی کر رہا تھا، اچانک سورج گرہن لگ گیا، تو میں نے تیروں کو پھینک دیا اور رسول اللہ ﷺ کی طرف چل پڑا، میں آپ ﷺ کے پاس پہنچا تو آپ ﷺ کھڑے ہو کر اپنے ہاتھ اٹھائے ہوئے اللہ کی تسبیح، تکبیر، حمد اور دعا میں مشغول تھے، یہاں تک کہ گرہن ختم ہو گیا، اور آپ ﷺ نے دو رکعتوں میں دو سورتیں تلاوت فرمائیں۔
یہ حدیث صحیح الاسناد ہے لیکن شیخین نے اسے روایت نہیں کیا۔

یعلیٰ بن عطاء اپنے والد سے اور وہ سیدنا عبداللہ بن عمرو رضی اللہ عنہما سے روایت کرتے ہیں۔ اور عطاء بن سائب اپنے والد سے اور وہ سیدنا عبداللہ بن عمرو رضی اللہ عنہما سے روایت کرتے ہیں، انہوں نے فرمایا: رسول اللہ ﷺ کے زمانے میں سورج گرہن لگا، تو رسول اللہ ﷺ کھڑے ہوئے اور اس قدر طویل قیام کیا کہ کہا جانے لگا: آپ ﷺ رکوع نہیں کریں گے، پھر آپ ﷺ نے رکوع کیا اور اس قدر طویل رکوع کیا کہ کہا جانے لگا: آپ ﷺ سر نہیں اٹھائیں گے، پھر آپ ﷺ نے سر اٹھایا اور اس قدر طویل قیام کیا کہ کہا جانے لگا: آپ ﷺ رکوع نہیں کریں گے، پھر آپ ﷺ نے رکوع کیا اور اس قدر طویل رکوع کیا کہ کہا جانے لگا: آپ ﷺ سر نہیں اٹھائیں گے، پھر آپ ﷺ نے سر اٹھایا اور اس قدر طویل قیام کیا کہ کہا جانے لگا: آپ ﷺ سجدہ نہیں کریں گے۔ (اور بقیہ حدیث ذکر کی)۔
یعلیٰ بن عطاء سے (سفیان) ثوری کی حدیث غریب صحیح ہے، اور شیخین نے مؤمل بن اسماعیل سے حجت پکڑی ہے لیکن اسے روایت نہیں کیا، اور جہاں تک عطاء بن سائب کا تعلق ہے تو انہوں نے انہیں روایت نہیں کیا۔