المستدرك على الصحيحين

سیدنا حذیفہ رضی اللہ عنہ سے روایت ہے کہ رسول اللہ ﷺ نے فرمایا: ”بے شک اللہ ہر کاریگر اور اس کی کاریگری کا خالق ہے۔“
یہ حدیث امام مسلم کی شرط پر صحیح ہے لیکن ان دونوں نے اسے روایت نہیں کیا۔

سیدنا حکیم بن حزام رضی اللہ عنہ سے روایت ہے، وہ کہتے ہیں کہ میں نے عرض کیا: اے اللہ کے رسول! جن منتروں (دم درود) سے ہم جھاڑ پھونک کرتے ہیں اور جن دواؤں سے ہم علاج کرتے ہیں، کیا وہ اللہ کی تقدیر میں سے کچھ ٹال سکتی ہیں؟ آپ ﷺ نے فرمایا: ”وہ (دوا اور دعا) بھی اللہ کی تقدیر ہی میں سے ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، امام مسلم نے معمر سے بصرہ میں ہونے والی غلطیوں کے بیان میں کہا ہے کہ معمر نے اسے دو بار روایت کیا، ایک بار «زهري عن ابن ابي خزامه عن ابيه» کی سند سے۔
امام حاکم فرماتے ہیں: میرے نزدیک یہ کوئی علت نہیں ہے کیونکہ صالح بن ابی الاخضر نے معمر بن راشد کی متابعت کی ہے، اور صالح اگرچہ زہری کے شاگردوں کے تیسرے طبقے میں سے ہیں لیکن ان جیسے راویوں سے استشہاد کیا جا سکتا ہے۔