مصنف ابن ابي شيبه

حضرت خلاس رحمہ اللہ فرماتے ہیں حضرت علی رضی اللہ عنہ نے مرتدہ عورت کے بارے میں ارشاد فرمایا : اس کی قیمت لگائی جائے گی۔ اور حضرت حماد رحمہ اللہ نے فرمایا : اس کو قتل کردیا جائے گا۔

حضرت ابو رزین رحمہ اللہ فرماتے ہیں کہ حضرت ابن عباس رضی اللہ عنہما نے ارشاد فرمایا : جب عورتیں اسلام سے مرتد ہوجائیں تو ان کو قتل نہیں کیا جائے گا بلکہ ان کو قید کردیا جائے گا اور اسلام کی طر ف بلایا جائے گا اور اسلام پر ان کو مجبور کیا جائے گا۔

حضرت لیث رحمہ اللہ فرماتے ہیں کہ حضرت عطاء رحمہ اللہ نے مرتدہ عورت کے بارے میں ارشاد فرمایا : کہ اسے قتل نہیں کیا جائے گا۔

حضرت عمرو رحمہ اللہ فرماتے ہیں کہ حسن رحمہ اللہ نے ارشاد فرمایا : مرتدہ عورت کو قتل نہیں کیا جائے گا۔

حضرت اشعث رحمہ اللہ فرماتے ہیں کہ حسن رحمہ اللہ نے ارشاد فرمایا : عورتیں جب اسلام سے مرتد ہوجائیں تو ان کو قتل نہیں کیا جائے گا۔ بلکہ ان کو اسلام کی دعوت دی جائے گی۔ اگر وہ انکار کردیں تو ان کو قید کردیا جائے گا۔ اور مسلمانوں کی باندیاں بنادیا جائے گا اور ان کو قتل نہیں کیا جائے گا۔

حضرت ابو حُرّہ رحمہ اللہ فرماتے ہیں کہ حسن رحمہ اللہ نے اس عورت کے بارے میں جو اسلام سے مرتد ہوجائے یوں ارشاد فرمایا : اس کو قتل نہیں کیا جائے گا اس کو قید کردیا جائے گا۔

حضرت عبیدہ رحمہ اللہ فرماتے ہیں کہ ابراہیم رحمہ اللہ نے ارشاد فرمایا : مرتدہ عورت کو بھی قتل کیا جائے گا۔

حضرت ہشام رحمہ اللہ فرماتے ہیں کہ حسن رحمہ اللہ نے مرتدہ عورت کے بارے میں ارشاد فرمایا : کہ اس سے توبہ طلب کی جائے گی۔ اگر وہ توبہ کرلے تو ٹھیک ورنہ اس کو قتل کردیا جائے گا۔

حضرت یحییٰ بن سعید رحمہ اللہ فرماتے ہیں کہ حضرت عمر بن عبد العزیز رحمہ اللہ نے ارشاد فرمایا : مسلمانوں میں سے ایک شخص کی ام ولد مرتد ہوگئی ۔ تو اس شخص نے اس کو دومۃ الجندل کے مقام پر اس کے دین کے مخالف شخص کو فروخت کردیا۔

حضرت ابو معشر رحمہ اللہ فرماتے ہیں کہ ابراہیم رحمہ اللہ نے اس عورت کے بارے میں جو اسلام سے مرتد ہوجائے یوں ارشاد فرمایا : کہ اس سے توبہ طلب کی جائے گی۔ پس اگر وہ توبہ قبول کرلے تو ٹھیک ورنہ اس کو قتل کردیا جائے گا۔

حضرت ابو معشر رحمہ اللہ سے ابراہیم رحمہ اللہ کا مذکورہ ارشاد اس سند سے بھی مروی ہے۔