مصنف ابن ابي شيبه

نافع سے روایت ہے کہ حضرت عائشہ رضی اللہ عنہا نے فرمایا : آدمی کو چاہیے کہ اپنی وصیت میں یہ بات لکھ دے : ” اگر مجھے موت آجائے قبل ازیں کہ میں اپنی اس وصیت کو تبدیل کروں۔ “

عامر بن عبد اللہ بن زبیر سے روایت ہے کہ حضرت ابن مسعود رضی اللہ عنہ نے وصیت کی اور اپنی وصیت میں لکھا : ” بِسْمِ اللہِ الرَّحْمَن الرَّحِیمِ یہ وصیت ہے ابن مسعود کی اگر اس کو اس بیماری میں موت آجائے۔ “

ہشام روایت کرتے ہیں کہ محمد نے فرمایا : لوگ جب وصیت کیا کرتے تھے تو اپنی وصیت میں لکھ دیا کرتے تھے کہ : ” اگر مجھے اپنی وصیت میں تبدیلی کرنے سے پہلے موت آجائے۔ “

ابو خلدہ سے روایت ہے کہ ابو العالیہ نے فرمایا : میں دس سے زائد مرتبہ وصیت کرچکا ہوں، میں وصیت کا ایک وقت مقرر کردیتا ہوں، جب وہ وقت آتا ہے تو مجھے اختیار حاصل ہوجاتا ہے ( اس وصیت کو باقی رکھوں یا بدل دوں) ۔

نافع سے روایت ہے کہ حضرت ابن عمر رضی اللہ عنہما نے اپنی وصیت میں یہ شرط لگائی تھی ” اگر مجھے اس تحریر میں تبدیلی کرنے سے پہلے موت آجائے۔ “