مصنف ابن ابي شيبه

حضرت رجاء بن حیوہ فرماتے ہیں کہ حضرت ابو الدرداء نے ارشاد فرمایا : تم مظلوم کی بد دعا سے بچو، کیونکہ اس کی بد دعا آسمان کی طر ف ایسے اٹھتی ہے جیسا کہ آگ کی چنگاریاں اٹھتی ہیں یہاں تک کہ اس کے لیے آسمان کے دروازے کھول دیے جاتے ہیں۔

حضرت معاذ بن جبل سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : تم مظلوم کی بد دعا سے بچو، کیونکہ اس کے درمیان اور اللہ کے درمیان کوئی پردہ نہیں ہوتا۔

حضرت ابو سعید مرفوعاً حدیث نقل کرتے ہیں کہ تم لوگ مظلوم کی بددعاؤں سے بچو۔

حضرت معن سے مروی ہے کہ حضرت عون ابن عبد اللہ نے ارشاد فرمایا : چار چیزیں ایسی ہیں جو اللہ سے چھپی نہیں رہتیں، رضامند والد کی دعا، عادل امام کی دعا، اور مظلوم کی بد دعا، اور کسی شخص کا اپنے بھائی کی غیر موجودگی میں اس کے حق میں دعا کرنا۔

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا مظلوم کی بد دعا قبول کی جاتی ہے اگر وہ گناہگار ہو تو اس کا گناہ اس کے نفس پر بوجھ ہوتا ہے۔

حضرت ابن الحبنائ سے مروی ہے کہ حضرت علی رضی اللہ عنہ نے ارشاد فرمایا : تین شخص ایسے ہیں جن کی دعا رد نہیں کی جاتی؛ وہ حاکم جو اپنی رعایاپر عدل کرنے والا ہو ، اور باپ کی دعا بیٹے کے حق میں، اور مظلوم کی بد دعا۔

حضرت عبد الرحمن بن ھلال سے مروی ہے کہ حضرت ابو الدرداء نے ارشاد فرمایا : تم مظلوم کی بد دعا سے بچو۔

حضرت عبد اللہ بن سلمہ سے مروی ہے کہ ایک شخص حضرت معاذ کی خدمت میں حاضر ہوا اور کہنے لگا : مجھے کچھ وصیت فرما دیں : تو آپ نے ارشاد فرمایا : تم مظلوم کی بد دعا سے بچو۔