مصنف ابن ابي شيبه

حضرت عبدالرحمن بن حرملہ فرماتے ہیں کہ میرے ایک پڑوسی نے نشہ کی حالت میں طلاق دے دی پھر اس نے مجھے حکم دیا کہ میں حضرت سعید بن مسیب سے سوال کروں، آپ نے فرمایا : اگر اس میں وہ حق پر ہو تو اسے اسّی کوڑے مارے جائیں گے اور اس کے اور اس کی گھر والی کے درمیان تفریق کردی جائے گی۔

حضرت عبدالرحمن بن عنبسہ فرماتے ہیں کہ حضرت عمر بن عبدالعزیز نے اس کی طلاق کو نافذ قرار دیا اور اس کو کوڑے مارے۔

ایوب فرماتے ہیں کہ حسن بصری اور حضرت ابن سیرین نے ارشاد فرمایا : نشہ میں دھت شخص کا طلاق دینا جائز ہے اور اس کی کمر پر کوڑے مارے جائیں گے۔

حضرت جعفر فرماتے ہیں کہ میمون نے ارشاد فرمایا : اس کا طلاق دینا جائز ہے اور اسے کوڑے مارے جائیں گے۔

حضرت اوزاعی فرماتے ہیں کہ حضرت زھری نے ارشاد فرمایا : جب نشہ کی حالت میں آزاد کرے یا طلاق دے تو اس کا طلاق دینا جائز ہوگا اور اس پر حد قائم کی جائے گی۔

حضرت شعبی نے فرمایا : اس کا طلاق دینا جائز ہے اور اس کی پیٹھ کو تکلیف دی جائے گی۔