مصنف ابن ابي شيبه

حضرت سعید بن یزید فرماتے ہیں کہ حضرت سنان بن سلمہ نے ان سے ارشاد فرمایا : آدمی بہت اچھا ہوتا ہے اگر اس کا تعلق قوم لوط سے ہو۔

حضرت لیث فرماتے ہیں کہ حضرت طاؤس فرمایا کرتے تھے : اس پر حد نہیں ہوگی مگر وہ یوں کہے : بیشک تو قوم لوط کے عمل جیسا عمل کرتا ہے۔

حضرت ضحاک سے بھی حضرت طاؤس جیسا قول اس سند سے منقول ہے۔

حضرت ابو خالد الواسطی فرماتے ہیں کہ حضرت شعبی نے ارشاد فرمایا : میں نہیں جانتا کہ اس پر حد لازم ہوگی۔

حضرت فرقد سبخی فرماتے ہیں کہ ایک آدمی نے کسی آدمی سے کہا : اے لوطی ! تو اس شخص نے حسن بصری اور محمد سے پوچھا ؟ ان دونوں حضرات نے فرمایا : اس پر حد جاری نہیں ہوگی اور حسن بصری نے فرمایا : مگر وہ یوں کہہ دے، بیشک تو قوم لوط کے عمل کی طرح عمل کرنے والا ہے۔

حضرت ابو العلائ فرماتے ہیں کہ حضرت قتادہ نے ارشاد فرمایا : اس پر کوئی سزا نہیں ہوگی اور حضرت ابو ہاشم نے فرمایا : جب وہ یوں کہے : بیشک تو نے فلاں سے اس کی سرین میں وطی کی ہے تو اس کو حد قذف کے کوڑے لگیں گے۔

حضرت قتادہ فرماتے ہیں کہ ایک آدمی نے حضرت ابو الاسود کو یوں کہا : اے لوطی ! تو آپ نے فرمایا : اللہ حضرت لوط پر رحم فرمائے۔ اور آپ نے اس کے بارے میں کسی چیز کو لازم نہیں سمجھا۔

حضرت منصور فرماتے ہیں کہ ابراہیم نے ارشاد فرمایا : کوڑے لگائے جائیں اس شخص کو جس نے یہ کا م کیا اور جس پر یہ الزام لگایا جائے۔