مصنف ابن ابي شيبه

حضرت عبداللہ بن عمرو فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا : کافر کی دیت مومن کی دیت کا نصف ہے۔

حضرت ابو الزناد فرماتے ہیں کہ حضرت عمر بن عبدالعزیز نے ارشاد فرمایا حلیف کی دیت مسلمان کی دیت کا نصف ہے۔

حضرت ہشام نے فرمایا میں نے حضرت عمر بن عبدالعزیز کا خط پڑھا : کہ یہودی اور عیسائی کی دیت مسلمان کی دیت کا ایک تہائی حصہ ہے۔

حضرت سعید بن مسیب فرماتے ہیں حضرت عمر بن خطاب نے ارشاد فرمایا یہودی اور عیسائی کی دیت چار ہزار درہم ہیں اور مجوسی کی دیت آٹھ سو درہم ہیں۔

حضرت عثمان بن غیاث فرماتے ہیں کہ حضرت عکرمہ اور حسن بصری ان دونوں حضرات نے ارشاد فرمایا : یہودی اور عیسائی کی دیت چار ہزار درہم ہے اور مجوسی کی دیت آٹھ سودرہم ہے۔

حضرت یحییٰ بن سعید فرماتے ہیں کہ حضرت سلیمان بن یسار نے ارشاد فرمایا : پہلے زمانے میں قاضی آتش پرست کی دیت میں آٹھ سو درہم کا فیصلہ کرتے تھے یہودی اور عیسائی کی دیت میں اتنی دیت کا فیصلہ فرماتے جتنی قبیلہ والے اپنے درمیان آپس میں مل کر ادا کرسکتے پھر دیت کا معاملہ چھ ہزار درہم کی طرف لوٹ آیا۔

حضرت عبدالملک فرماتے ہیں کہ حضرت عطاء نے ارشاد فرمایا : یہودی اور عیسائی کی دیت چار ہزار درہم ہے، اور آتش پرست کی دیت آٹھ سو درہم ہے۔

حضرت اشعث فرماتے ہیں کہ حضرت نافع اور حضرت عمرو بن دینار یہ دونوں حضرات فرمایا کرتے تھے، یہودی اور عیسائی کی دیت چار ہزار درہم ہے۔

حضرت سعید بن مسیب فرماتے ہیں کہ حضرت عثمان نے یہودی اور عیسائی کی دیت میں چار ہزار درہم کا فیصلہ فرمایا۔