مصنف ابن ابي شيبه

حضرت ابن سیرین فرماتے ہیں کہ رسول اللہ صلی اللہ علیہ وآلہ وسلم نے غرہ کا بوجھ عصبی رشتہ داروں پر ڈالا۔

حضرت مغیرہ فرماتے ہیں کہ ابراہیم نے ارشاد فرمایا : غرہ آدمی کے عصبی رشتہ داروں پر لازم ہوگا۔

حضرت ابن سالم فرماتے ہیں کہ امام شعبی نے ارشاد فرمایا غرہ اس آدمی کے مال میں لازم ہوگا۔

حضرت جابر فرماتے ہیں کہ نبی کریم صلی اللہ علیہ وآلہ وسلم نے عورت کے پیٹ میں موجود بچہ ہلاک کرنے کی صورت میں غرہ کا بوجھ قتل کرنے والی عورت کے عصبی رشتہ داروں پر ڈالا اور اس عورت کے خاوند اور اس کے لڑکے کو بری کردیا۔

حضرت مغیرہ بن شعبہ فرماتے ہیں رسول اللہ صلی اللہ علیہ وآلہ وسلم نے فیصلہ فرمایا کہ دیت عصبی رشتہ داروں پر لازم ہوگی اور حمل ساقط کرنے کی صورت میں غرہ ہوگا۔

حضرت سعید بن مسیب فرماتے ہیں کہ حضرت عمر نے بستی والوں پر غرہ مقرر فرمایا اور جنگل میں رہنے والوں پر اونٹ مقرر فرمائے۔

حضرت قتادہ فرماتے ہیں کہ حسن بصری نے ارشادفرمایا : عورت کے پیٹ میں موجود بچہ ہلاک کرنے کی دیت اس شخص کے مال سے ادا کی جائے گی جس نے اسے موت کے گھاٹ اتارا اور اس کی قوم پر کوئی چیز لازم نہیں ہوگی۔