مصنف ابن ابي شيبه

حضرت ابوہریرہ فرماتے ہیں کہ ابراہیم نے قدوم مقام پر ایک سو بیس سال کی عمر میں ختنہ کیا، پھر آپ اس کے بعد اسّی سال تک زندہ رہے۔

حضرت سعید بن مسیب فرماتے ہیں کہ ابراہیم سب سے پہلے شخص تھے جنہوں نے مہمان کی ضیافت کی اور سب سے پہلے شخص تھے جنہوں نے مونچھ کاٹی، اور اپنے ناخنوں کو کاٹا، اور شرمگاہ کے بال صاف کیے، اور پہلے شخص تھے جنہوں نے ختنہ کیا ، اور پہلے شخص تھے جنہوں نے سفید بال دیکھے۔ تو کہنے لگے : اے میرے پروردگار ! یہ کیا چیز ہے ؟ اللہ رب العزت نے ارشاد فرمایا : یہ عزت و وقار ہے۔ آپ نے عرض کیا ! پروردگار ! میرے وقار میں اضافہ فرما۔

حضرت شداد بن اوس فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : ختنہ کرنا آدمیوں کے لیے سنت ہے اور عورتوں کے لیے عزت کی چیز ہے۔

حضرت ابوہریرہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا : پانچ چیزیں فطرت میں سے ہیں ۔ اور آپ صلی اللہ علیہ وآلہ وسلم نے ختنہ کا بھی ذکر فرمایا۔

حضرت منصور فرماتے ہیں کہ حضرت مجاہد اور ابراہیم ان دونوں حضرات نے ارشاد فرمایا : کہ ختنہ کرنا سنت ہے۔