مصنف ابن ابي شيبه

حضرت ابن عون فرماتے ہیں کہ حضرت محمد بن سیرین ، حضرت قاسم بن محمد اور حضرت رجاء بن حیوہ ان لوگوں میں سے تھے جو اس بات کی کوشش کرتے تھے کہ وہ حدیث کو ویسے ہی بیان کریں جیسے انہوں نے سنی ۔ اور حسن بصری ، ابراہیم اور حضرت شعبی ان لوگوں میں سے تھے جو اس بات کی کوشش نہیں کرتے تھے۔ حضرت ابن عون فرماتے ہیں کہ میں نے امام محمد سے عر ض کیا : بیشک فلاں شخص اس بات کی کوشش نہیں کرتا کہ وہ حدیث کو ویسے ہی بیان کرے جیسے اس نے سنا۔ آپ نے فرمایا : اگر وہ ایسا کرلے تو یہ اس کے لیے بہتر ہے۔

حضرت عمارہ فرماتے ہیں کہ حضرت ابو معمر حدیث میں ہونے والی غلطی کے بعد صحیح الفاظ کو دہرا لیتے تھے تاکہ ویسے ہی بیان کرسکیں جیسے انہوں نے سنی۔

حضرت اشعث فرماتے ہیں کہ حسن بصری اور حضرت شعبی یہ دونوں حضرات حدیث کو مقدم اور مؤخر کردینے میں کوئی حرج نہیں سمجھتے تھے۔ اور حضرت ابن سیرین اس بات میں تکلیف کرتے تھے کہ حدیث کو جیسے سنا ویسے بیان کریں۔

حضرت اسماعیل بن امیہ فرماتے ہیں کہ ہم نے حضرت نافع کے پاس حدیث میں غلطی پر ٹھہرنے کا ارادہ کیا تو آپ نے انکار کردیا۔

حضرت اعمش فرماتے ہیں کہ ہم نے حضرت ابو الضحی سے پوچھا : المصورون الفاظ ہیں ؟ آپ نے فرمایا : المصورین ہیں۔

حضرت جابر فرماتے ہیں کہ میں نے حضرت عامر سے پوچھا : میں حدیث میں غلطی کو سنوں تو کیا کروں ؟ آپ نے فرمایا : اس کو درست کرو۔