مصنف ابن ابي شيبه

حضرت شرید فرماتے ہیں کہ قبیلہ ثقیف کے وفد میں کوئی شخص جذام میں مبتلا تھا۔ نبی کریم صلی اللہ علیہ وآلہ وسلم نے اس کی طرف قاصد بھیج کر پیغام بھجوایا کہ ہم نے تجھ سے بیعت لے لی، تم واپس لوٹ جاؤ۔

حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : تم لوگ کوڑھ میں مبتلا لوگوں کو مسلسل مت دیکھو۔

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : جذام زدہ شخص سے ایسے بھاگو جیسے شیر سے بھاگتے ہو۔

حضرت ولید بن عبداللہ فرماتے ہیں کہ نبی کریم صلی اللہ علیہ وآلہ وسلم جذام زدہ شخص پر گزرے تو آپ صلی اللہ علیہ وآلہ وسلم نے اپنی ناک کو ڈھانک لیا۔ آپ صلی اللہ علیہ وآلہ وسلم سے پوچھا گیا : یا رسول اللہ صلی اللہ علیہ وآلہ وسلم ! کیا آپ صلی اللہ علیہ وآلہ وسلم نے نہیں فرمایا تھا : چھوت کی کوئی حقیقت نہیں ، بدفالی کی کوئی حقیقت نہیں ؟ ! آپ صلی اللہ علیہ وآلہ وسلم نے فرمایا : کیوں نہیں۔

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : بیمار کو تندرست کے پاس مت لاؤ۔

حضرت نافع بن جبیر فرماتے ہیں کہ حضرت کعب نے حضرت عبد اللہ بن عمرو رضی اللہ عنہ سے پوچھا : کیا بدشگونی ہوتی ہے ؟ آپ نے فرمایا : جی ہاں ! انہوں نے پوچھا : پھر آپ کیا دعا پڑھتے ہو ؟ آپ نے فرمایا میں یہ دعا کرتا ہوں۔ ترجمہ : اے اللہ ! کوئی بدفالی نہیں سوائے تیری بدفالی کے ۔ اور کوئی خیر نہیں سوائے تیری خیر کے۔ اور تیرے سوا ہمارا کوئی پروردگار نہیں۔ حضرت کعب نے فرمایا : تم عرب کے سب سے بڑے فقیہ ہو۔

حضرت خالد حذاء فرماتے ہیں کہ حضرت ابو قلابہ پسند کرتے تھے کہ جذام زدہ شخص سے بچا جائے۔