مصنف ابن ابي شيبه

امام شعبی فرماتے ہیں کہ میں نے حضرت عبد اللہ بن عمرو رضی اللہ عنہ کو یوں فرماتے ہوئے سنا کہ سائے اور سورج کے درمیان میں بیٹھنا شیطان کے بیٹھنے کا طریقہ ہے۔

حضرت قتادہ فرماتے ہیں کہ رسول اللہ صلی اللہ علیہ وآلہ وسلم نے اس بات سے منع فرمایا کہ کوئی آدمی سائے اور سورج کے درمیان میں بیٹھے۔

حضرت زیاد جو بنو محزوم کے آزاد کردہ غلام ہیں فرماتے ہیں کہ حضرت ابوہریرہ نے ارشاد فرمایا : سائے کا کنارہ شیطان کے بیٹھنے کی جگہ ہے۔

حضرت نفیع الجمال فرماتے ہیں کہ حضرت سعید بن المسیب نے ارشاد فرمایا : سایہ کا کناری شیطان کے قیلولہ کرنے کی جگہ ہے۔

حضرت ابو عیاض فرماتے ہیں کہ حضرت عبید بن عمیر نے ارشاد فرمایا : کہ سورج اور سایہ کا کنارہ شیطان کے بیٹھنے کی جگہیں ہیں۔

حضرت خالد فرماتے ہیں کہ حضرت عکرمہ نے اس شخص کے بارے میں جو سورج اور سائے کے درمیان بیٹھے ہوں ارشاد فرمایا کہ وہ تو شیطان کے بیٹھنے کی جگہ ہے۔

حضرت بریدہ فرماتے ہیں کہ نبی کریم صلی اللہ علیہ وآلہ وسلم نے سایہ اور سورج کے درمیان بیٹھنے سے منع فرمایا۔