مصنف ابن ابي شيبه

حضرت مسروق فرماتے ہیں کہ میں حضرت عمر بن خطاب سے ملا تو آپ نے پوچھا ! تم کون ہو ؟ میں نے عرض کیا : کہ مسروق بن اجدع ہوں۔ اس پر حضرت عمر نے فرمایا کہ میں نے رسول اللہ صلی اللہ علیہ وآلہ وسلم کو یوں فرماتے سنا کہ اجدع تو شیطان ہے۔

حضرت اعمش فرماتے ہیں کہ حضرات ابن عمر رضی اللہ عنہما نے عبد ربہ نام رکھنے کو ناپسند کیا۔

حضرت عبد الکریم فرماتے ہیں کہ حضرت مجاہد نے عبد ربہ نام کو ناپسند کیا۔

حضرت ابن ابی نجیح فرماتے ہیں کہ حضرت مجاہد نے ارشاد فرمایا : کہ اللہ نے مالک نام رکھنے کو ناپسند فرمایا۔

حضرت سمرہ فرماتے ہیں کہ رسول اللہ صلی اللہ علیہ وآلہ وسلم نے ہمیں اپنے غلاموں کے چار نام رکھنے سے منع فرمایا : و ہ نام یہ ہیں۔ أفلح، نافع، رباح، اور یسار۔

حضرت جابر فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : اگر اللہ نے چاہا تو میں عنقریب اپنی امت کو ان ناموں کے رکھنے سے منع کروں گا۔ نافع، افلح، اور برکۃ۔ حضرت اعمش فرماتے ہیں کہ مجھے معلوم نہیں کہ راوی نے رافع نام ذکر کیا یا نہیں۔ اس لیے کہ جب کوئی آدمی آ کر پوچھتا : کیا برکۃ یہاں ہے ؟ تو گھر والے کہتے ہیں : نہیں۔

حضرت ابو خلدہ فرماتے ہیں کہ حضرت ابو العالیہ نے ارشاد فرمایا : تم لوگ یہ بہت برا کرتے ہو ! کہ اپنے بچوں کے نام انبیاء کے نام پر رکھتے ہو پھر ان کو لعن طن کرتے ہو۔