مصنف ابن ابي شيبه

حضرت ابی قلابہ فرماتے ہیں کہ حضرت ابو مسعود نے حضرت ابو عبد اللہ سے پوچھا یا حضرت ابوعبداللہ نے حضرت ابو مسعود سے پوچھا : کہ تم نے نبی کریم صلی اللہ علیہ وآلہ وسلم سے لفظ زعموا کے بارے میں کچھ سنا ہے ؟ آپ نے فرمایا : میں نے نبی کریم صلی اللہ علیہ وآلہ وسلم کو یوں فرماتے ہوئے سنا کہ آدمی کی بدترین سواری یہ ہے کہ وہ کہے لوگ یہ سمجھتے ہیں۔

حضرت منصور فرماتے ہیں کہ حضرت عبد اللہ بن مسعود رضی اللہ عنہ ” زعموا “ کہنے کو مکروہ سمجھتے تھے۔

حضرت عبدربہ فرماتے ہیں کہ حضرت مجاہد لفظ ” زعموا “ کے استعمال کرنے کو مکروہ سمجھتے تھے، پھر حضرت سفیان نے قرآن کی یہ آیت تلاوت فرمائی۔ زعم الذین کفروا۔

حضرت اعمش فرماتے ہیں کہ حضرت شریح نے لفظ ” زعموا “ کے بارے میں فرمایا کہ یہ جھوٹ کے تابع ہے۔

حضرت مجاہد فرماتے ہیں کہ حضر ت ابن عون نے لفظ ” زعموا “ کے بارے میں فرمایا : یہ جھوٹ کے تابع ہے۔ اور تم ہرگز جھوٹ کے تابع مت بنو۔

حضرت یحییٰ بن ھانی فرماتے ہیں کہ میرے والد نے مجھے کہا : اے میرے بیٹے : اپنے کلام میں دو لفظوں کو استعمال کرنے سے بچو ۔ اور وہ یہ ہیں۔ ” زعموا “ اور ” سوف “ ۔

حضرت یحییٰ بن وثاب فرماتے ہیں کہ حضرت شریح نے مجھ سے فرمایا : بیشک ” زعموا “ جھوٹ کی کنیت ہے۔