مصنف ابن ابي شيبه

حضرت جابر فرماتے ہیں کہ ایک آدمی مسجد میں تیر لے کر گزرا، تو رسول اللہ صلی اللہ علیہ وآلہ وسلم نے اس سے فرمایا : اس کے پھل کو اپنے سے چمٹا لو۔

حضرت ابو بردہ فرماتے ہیں کہ ان کے والد نے ارشاد فرمایا : جب تم میں کوئی مسجد میں تیر لے کر گزرے تو اس کو چاہیے کہ اس کے پھل کو اپنے سے چمٹا لے۔

حضرت انس رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے چند لوگوں کو دیکھا کہ وہ سونتی ہوئی تلوار لے رہے ہیں تو آپ صلی اللہ علیہ وآلہ وسلم نے فرمایا : ان پر اللہ لعنت کرے۔ راوی کہتے ہیں ! میں نے حسن سے پوچھا : کیا وہ مسجد میں تھے ؟ آپ نے فرمایا : نہیں ، بلکہ مسجد کے صحنوں میں سے ایک صحن میں تھے۔

حضرت لیث فرماتے ہیں کہ حضرت مجاہد نے ارشاد فرمایا : ملعون ہے وہ شخص جو مسجد میں اپنے بھائی کو سونتی ہوئی تلوار پکڑائے۔

حضرت اسلم المنقری فرماتے ہیں کہ حضرت عبد اللہ بن عبد الرحمن بن ابزی مسجد میں تلوار سونت لینے کو مکروہ سمجھتے تھے۔

حسن فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا : جو اپنے بھائی سے تلوار پکڑے تو اس کو چاہیے کہ وہ تلوار نیام میں کرلے۔

حضرت جابر فرماتے ہیں کہ رسول اللہ صلی اللہ علیہ وآلہ وسلم نے سونتی ہوئی تلوار لینے سے منع فرمایا۔

حسن فرماتے ہیں کہ نبی کریم صلی اللہ علیہ وآلہ وسلم نے سونتی ہوئی تلوار لینے سے منع فرمایا اور آپ صلی اللہ علیہ وآلہ وسلم لوگوں کے پاس سے گزرے جو سونتی ہوئی تلوار لے رہے تھے تو آپ صلی اللہ علیہ وآلہ وسلم نے فرمایا : کیا میں نے تمہیں ایسا کرنے سے منع نہیں کیا تھا ؟ اللہ لعنت کرے اس شخص پر جو یہ کرے۔