مصنف ابن ابي شيبه

حضرت ثمامہ سے روایت ہے۔ وہ کہتے ہیں کہ حضرت انس جب پانی پیتے تھے تو دو یا تین مرتبہ سانس لیتے تھے اور یہ حدیث بیان کرتے تھے کہ جناب رسول اللہ صلی اللہ علیہ وآلہ وسلم جب پانی پیتے تھے تو برتن میں تین مرتبہ سانس لیتے تھے۔

حضرت حکم بن عطیہ سے روایت ہے۔ وہ کہتے ہیں کہ میں نے حضرت ابن سیرین کو دیکھا کہ وہ جب پانی پیتے تو تین سانس لیتے تھے۔

حضرت مجاہد سے روایت ہے۔ وہ فرماتے ہیں ۔ جب تم پانی پیو تو برتن میں تین مرتبہ سانس لو۔

حضرت محمد بن عبد الرحمن بن ابی بکر سے روایت ہے ۔ وہ کہتے ہیں کہ ایک شخص حضرت ابن عباس رضی اللہ عنہما کے پاس آ کر بیٹھا تو آپ نے اس سے پوچھا، تم (اس وقت) کہاں سے آئے ہو ؟ اس نے کہا۔ میں زم زم کا پانی پی کر آیا ہوں۔ ابن عباس رضی اللہ عنہما نے کہا۔ زم زم کا پانی جس طرح پینا چاہیئے تم نے اسی طرح پیا ہے ؟ پھر آپ نے فرمایا : جب تم زم زم کا پانی پیو تو قبلہ رُخ ہو جاؤ ، اللہ کا نام لو۔ اور تین سانس لو۔

حضرت انس سے روایت ہے کہ جناب رسول اللہ صلی اللہ علیہ وآلہ وسلم برتن میں تین سانس لیا کرتے تھے۔

حضرت انس سے روایت ہے کہ جناب رسول اللہ صلی اللہ علیہ وآلہ وسلم برتن میں تین مرتبہ سانس لیا کرتے تھے اور ارشاد فرماتے تھے۔ ” یہ طریقہ زیادہ سہل ، شیریں اور اطمینان بخش ہے۔ “