مصنف ابن ابي شيبه

آنحضرت صلی اللہ علیہ وسلم نے بیع میں عُرْبان کو حلال قرار دیا ہے۔ عربان کہتے ہیں کہ ایک شخص کسی چیز کی آدھی قیمت ادا کر دے اور کہہ دے کہ اگر بیع مکمل ہوگئی تو یہ اس کا ثمن میں شمار ہوگا وگرنہ یہ رقم تیری میں آپ سے وصول نہ کروں گا۔

حضرت سعید بن المسیب رحمہ اللہ فرماتے ہیں کہ چکنائی میں، چارے میں اور گندم میں عربان درست نہیں ہے، اور عربان ان کے علاوہ میں ہے۔

حضرت مجاہد عُرْبان میں کوئی حرج نہ سمجھتے تھے۔

حضرت ابن سیرین رحمہ اللہ اس میں کوئی حرج نہ سمجھتے تھے کہ کوئی شخص ملاح یا کسی اور کو یہ کہہ کر رقم دے کہ اگر میں فلاں فلاں جگہ گیا تو اس کا ہے اور اگر نہ گیا تو یہ رقم تیری۔

حضرت حمزہ بن عبد اللہ بن عمر رضی اللہ عنہما ارشاد فرماتے ہیں کہ ہم لوگ حضرت ابن عمر رضی اللہ عنہما کے سامنے کپڑوں کی بیع کرتے، جو فدیہ دیتا تو وہ درہم فدیہ دیتا، پس وہ نہ ہمیں حکم کرتے اور نہ ہی ہمیں روکتے۔

آنحضرت صلی اللہ علیہ وسلم نے بیع میں عُرْبان کو حلال قرار دیا تھا۔

حضرت عبد الرحمن بن فروخ سے مروی ہے کہ حضرت نافع بن عبد الحارث نے صفوان بن امیہ سے چار ہزار درہم میں جیل خانہ اس شرط پر خریدا کہ اگر حضرت عمر رضی اللہ عنہ راضی ہوئے تو بیع ہے اور اگر حضرت عمر رضی اللہ عنہ راضی نہ ہوئے تو چار سو درہم صفوان کے ہوں گے۔

حضرت ابن سیرین رحمہ اللہ اس شخص کے متعلق فرماتے تھے کہ جو کرایہ پر گھر یا کشتی لے یہ کہہ کر کہ اگر فلاں فلاں جگہ گیا تو یہ اس کے لئے ہے وگرنہ یہ رقم تمہاری ہے، فرمایا : اگر وہ نہ آیا تو رقم اس کی ہوگی۔

حضرت عطاء اور حضرت طاؤس رحمہ اللہ بیع میں عُرْبان کو ناپسند کرتے تھے۔