مصنف ابن ابي شيبه

حضرت عبد اللہ بن عامر بن ربیعہ فرماتے ہیں کہ حضرت عمر بن خطاب رضی اللہ عنہ نے جھوٹے گواہ کو شام کے وقت ایک چادر میں کھڑا کیا ہوا تھا اس کو ملامت کر رہے تھے۔

حضرت شریح رحمہ اللہ جھوٹے گواہ کو مسجد یا بازار میں بھیج کر یہ اعلان کرواتے کہ : ہم نے اس کی گواہی کو رد کردیا ہے (یہ جھوٹا ہے) ۔

حضرت ابو حصین رحمہ اللہ فرماتے ہیں کہ حضرت قاسم رحمہ اللہ میرے پاس تشریف فرما تھے، فرمایا : حضرت شریح جب جھوٹے گواہ کو پکڑتے تو اس کے ساتھ کیا معاملہ فرماتے ، میں نے عرض کیا : اس کا نام اپنے پاس لکھ دیتے اور پھر اگر وہ عرب میں سے ہوتا تو اس کو مسجد بھیج دیتے ، اور اگر وہ موالی میں سے ہوتا تو اس کو بازار میں بھیج دیتے اس کے متعلق لوگوں کو بتاتے۔

حضرت جعد فرماتے ہیں کہ میں حضرت شریح کے پاس موجود تھا، آپ نے جھوٹے گواہ کے سر سے عمامہ اتروا کر اس کو ” خفقات “ مروائے (خفقات سے مراد کوئی ایسا آلہ ہے ک ہ جس سے مارا جاتا تھا۔ ممکن ہے اس سے مراد جوتے ہوں) ۔

حضرت عبد الکریم الجزری رحمہ اللہ سے مروی ہے کہ حضرت عمر بن عبد العزیز کے پاس کچھ لوگوں نے رمضان کے چاند کی گواہی دی، آپ نے ان کو جھوٹا قرار دیا اور ان سب کو ستر ستر کوڑے مارے اور ان کی شہادت کو باطل قرار دیا۔

حضرت زہری رحمہ اللہ فرماتے ہیں کہ جھوٹے گواہ کی تعزیر کی جائے گی۔

حسن فرماتے ہیں کہ جھوٹے گواہ کو مارا جائے گا، اور لوگوں میں اس کو مشہور کیا جائے گا، اور اعلان کیا جائے گا کہ یہ جھوٹاگواہ ہے۔

حضرت شعبی رحمہ اللہ فرماتے ہیں کہ جھوٹے گواہ کو چالیس سے کم ، پینتیس یا چھتیس یا سینتیس کوڑے مارے جائیں گے۔

حضرت عمر بن عبد العزیز رحمہ اللہ نے جھوٹے گواہ کو ستر کوڑے مارے۔

حضرت شریح کے پاس جب جھوٹا گواہ آتا تو آپ اس کا عمامہ اتروا کر اس کو جوتے لگواتے۔