مصنف ابن ابي شيبه

حضرت ابو سلمہ سے مروی ہے کہ آنحضرت صلی اللہ علیہ وسلم نے ہر اس شخص کے لئے شفعہ کا فیصلہ فرمایا جس کا حصہ تقسیم نہ ہوا ہو، اور (جب) اگر حدود الگ الگ ہوجائیں تو شفعہ کا حق حاصل نہیں۔

حضرت عثمان ارشاد فرماتے ہیں کہ کنویں اور چکی میں حق شفعہ حاصل نہیں، اور حد بندی ہر شفعہ کے حق کو ختم کردیتی ہے۔

حضرت عمر رضی اللہ عنہارشاد فرماتے ہیں کہ جب حدود جدا جدا ہوجائیں اور لوگوں کو حدود معلوم بھی ہوجائیں تو پھر ان میں آپس میں شفعہ نہیں ہے۔

حضرت ایاس بن معاویہ پڑوسیوں کے لئے شفعہ کا فیصلہ فرماتے تھے، یہاں تک کہ حضرت عمر بن عبدالعزیز کا ان کے پاس خط پہنچا۔ اس میں تحریر تھا کہ پڑوسی کے حق میں فیصلہ نہ کیا کرو۔ ہاں البتہ اگر دونوں باہم شریک ہوں یا پھر گھر دونوں کا ایسا ہو کہ ایک ہی دروازہ دونوں کو سکتا ہو تو تب پڑوسی کے حق میں فیصلہ دے سکتے ہو۔

حضرت عمر بن عبد العزیز رحمہ اللہ نے فرمایا : جب زمین تقسیم ہوجائے اور حد بندی ہوجائے اور راستے الگ الگ ہوجائیں تو حق شفعہ حاصل نہیں ہے۔

حضرت عمر رضی اللہ عنہ نے فرمایا : جب حدود الگ ہوجائیں اور لوگ اپنے اپنے حق کو پہچان لیں تو ان میں سے کسی کو شفعہ کا حق حاصل نہیں۔