مصنف ابن ابي شيبه

حضرت عبد اللہ رضی اللہ عنہ حیوان کی بیع سلم کو ناپسند کرتے تھے۔

حضرت عمر رضی اللہ عنہ حضرت حذیفہ رضی اللہ عنہ اور حضرت ابن مسعود رضی اللہ عنہ حیوان کی بیع سلم کو ناپسند کرتے تھے۔

حضرت طارق سے مروی ہے کہ حضرت زید بن خلیدہ نے عتریس بن عرقوب کے ساتھ نو عمر غلاموں میں بیع سلم کیا، پھر اس کے بارے میں حضرت ابن مسعود رضی اللہ عنہ سے دریافت کیا ؟ حضرت رضی اللہ عنہ نے حیوان کی بیع سلم کو ناپسند کیا۔

حضرت عمر رضی اللہ عنہ فرماتے ہیں کہ عمر والے جانوروں میں بیع سلم کرنا رباء میں سے ہے۔

حضرت عبد الاعلیٰ فرماتے ہیں کہ میں حضرت شریح رحمہ اللہ کی خدمت میں حاضر تھا آپ رحمہ اللہ نے حیوان کی بیع سلم کو رد فرما دیا۔

حضرت سوید بن غفلہ حیوان میں بیع سلم کو ناپسند کرتے تھے۔

حضرت ضحاک رحمہ اللہ نے پہلے حیوان میں بیع سلم کی اجازت دی تھی پھر آپ نے اس سے رجوع فرما لیا۔

حضرت عمر رضی اللہ عنہ نے حضرت عبد اللہ رضی اللہ عنہ کو لکھا کہ حیوان میں بیع سلم نہ کرو ۔

حضرت سعید بن جبیر رحمہ اللہ سے حیوان میں بیع سلم کے متعلق دریافت کیا ؟ آپ نے اس سے منع فرمایا ۔ سوال کرنے والے نے کہا کہ آپ جب دو سال ملک آزر بیجان میں تھے تو آپ حیوان میں بیع سلم ہوتے ہوئے دیکھتے تھے لیکن آپ اس سے منع کیوں نہیں کرتے تھے ؟ حضرت سعید رحمہ اللہ نے فرمایا : کیا میں اپنی رائے ایسے لوگوں میں رکھوں جو اس کی قدر ہی نہیں کرتے ؟ حضرت حذیفہ رضی اللہ عنہ بن الیمان رضی اللہ عنہ اس سے منع فرماتے تھے۔

حضرت ابو نضرہ رحمہ اللہ فرماتے ہیں کہ میں نے حضرت ابن عمر رضی اللہ عنہما سے دریافت کیا کہ ہمارے امراء ہمیں حیوان میں بیع سلم سے منع کرتے ہیں۔ آپ رضی اللہ عنہ نے فرمایا پھر اگر تمہارے امراء اس سے منع کرتے ہیں تو ان کی اطاعت کرو اور اس وقت ان کے امراء حضرت حکم غفاری اور حضرت عبد الرحمن بن سمرۃ رحمہ اللہ جیسے حضرات تھے۔