مصنف ابن ابي شيبه

حضرت جابر رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا : شفیع پڑوسی پر شفعہ کرنے کا زیادہ حق دار ہے، اگر ان دونوں کا راستہ ایک ہو اور شفیع غائب ہو تو اس کا انتظار کیا جائے گا۔

حضرت عمر بن عبد العزیز رحمہ اللہ نے دس سال بعد شریک کے لئے شفعہ کا فیصلہ فرمایا، اس کا شریک (ساتھی) غائب تھا۔

حسن رحمہ اللہ بچے اور غائب کے لئے شفعہ کا حق سمجھتے تھے۔

حضرت شریح رحمہ اللہ فرماتے ہیں کہ اگر گھر فروخت ہو اور اس کا شفیع غائب ہو یا چھوٹا ہو تو غائب واپس آنے تک شفعہ کا زیادہ حق دار ہے اور چھوٹا بچہ بڑا ہونے تک حق دار ہے۔

ابراہیم رحمہ اللہ اور حضرت حارث فرماتے ہیں کہ غائب کے لئے شفعہ کا حق نہیں ہے۔

حضرت شعبی رحمہ اللہ اور حضرت حاکم رحمہ اللہ فرماتے ہیں غائب کے لئے شفعہ کا حق ہے۔

حضرت شعبی رحمہ اللہ فرماتے ہیں کہ غائب کے لئے شفعہ کا حق ہے۔ اس کو خط لکھا جائے گا، اگر وہ شفعہ کو قبول کرے اور گھر کا ثمن بھیج دے تو ٹھیک وگرنہ اس کے لئے شفعہ نہیں ہے۔ ( حق ختم ہوجائے گا۔ )