مصنف ابن ابي شيبه

حضرت جابر رضی اللہ عنہ سے مروی ہے کہ نبی کریم صلی اللہ علیہ وسلم نے اس بات سے منع فرمایا ہے کہ بیع کر کے اس میں کچھ حصہ (مجہول) الگ کرلیا جائے۔

حضرت عمرو بن شعیب فرماتے ہیں کہ میں نے حضرت سعید بن مسیب رحمہ اللہ سے دریافت کیا کہ : میں اپنی زمین کے پھل فروخت کر کے اس میں سے کچھ حصہ الگ کرسکتا ہوں ؟ آپ نے فرمایا مستثنیٰ نہ کرو، اگر کرنا ہے تو ایک معین درخت الگ کرلو، لیکن اس کو بھی صدقہ سے بری نہ کرنا۔ راوی کہتے ہیں کہ میں نے حضرت محمد بن سیرین رحمہ اللہ سے اس کا ذکر کیا تو آپ نے اس رائے کو پسند فرمایا۔

حضرت قاسم رحمہ اللہ فرماتے ہیں کہ اگر حضرت ابن عمر رضی اللہ عنہما بعض مجہول حصہ الگ کرنے کو ناپسند نہ کرتے اور ہماری اپنی مرضی ہوتی تو ہم لوگ اس میں کوئی حرج نہ سمجھتے۔ ابن علیۃ راوی اضافہ فرماتے ہیں کہ حضرت ابن عمر رضی اللہ عنہما فرماتے تھے میں اس (معین) درخت کو فروخت نہیں کروں اس درخت ( معین) کو فروخت نہیں کروں گا۔

حضرت سعید بن المسیب رحمہ اللہ اس بات کو ناپسند فرماتے تھے کہ کھجور کے درختوں میں سے کچھ ماپ کر خریدے جائیں۔

حضرت ابو حمزہ رحمہ اللہ فرماتے ہیں کہ میں نے ابراہیم سے عرض کیا کہ میں ایک آدمی کو بکری فروخت کر کے اس کا بعض حصہ مستثنیٰ کیا ہے، ایسا کرنا کیسا ہے ؟ آپ نے فرمایا کہ ٹھیک نہیں ۔ بلکہ آپ اس کو یوں کہو کہ میں نصف بکری آپ کو فروخت کرتا ہوں۔

حضرت جابر رضی اللہ عنہ سے دریافت کیا گیا کہ آدمی کوئی چیز فروخت کرتا ہے اور اس میں سے کچھ مستثنیٰ کرتا ہے ؟ آپ نے فرمایا یہ ٹھیک نہیں ہے۔

حسن رحمہ اللہ سے دریافت کیا گیا کہ آدمی اپنی زمین سے کھجور کی بیع کرے اور ایک ( یا کچھ) کُرّ مستثنیٰ کرلے، آپ نے فرمایا تعجب ہے کہ وہ کھجور کے درخت کو جانتا ہے ( کہ وہ کتنی کھجور دے گا) ۔

حضرت حجاج فرماتے ہیں کہ میں نے حضرت ابوبکر بن ابو موسیٰ رحمہ اللہ سے دریافت کیا کہ ایک آدمی نے دوسرے کو سامان فروخت کیا اور اس نے کہا کہ میں سامان میں تیرا شریک ہوں ؟ آپ نے اس بیع کو ناپسند فرمایا۔

حضرت سالم اس بات کو ناپسند فرماتے تھے کہ بیع میں کچھ کیل، کُرّ یا خاص برتن مستثنیٰ کر لئے جائیں۔