مصنف ابن ابي شيبه

ابراہیم رحمہ اللہ فرماتے تھے کہ بچوں کی گواہی بعض کی بعض کے خلاف جائز ہے۔

حضرت شریح رحمہ اللہ بعض بچوں کی گواہی ایک دوسرے پر بیع کے معاملہ میں صحیح سمجھتے تھے۔

حضرت عروہ رحمہ اللہ فرماتے تھے کہ بچوں کی گواہی جائز ہے، اور ان کی پہلی بات لی جائے گی۔

حضرت ابن عباس رضی اللہ عنہما بچوں کی گواہی کے متعلق فرماتے ہیں کہ اللہ تعالیٰ کا ارشاد ہے کہ { مِمَّنْ تَرْضَوْنَ مِنَ الشُّہَدَائِ } جبکہ بچے مِمَّنْ تَرْضَوْنَ میں نہیں آتے۔ حضرت ابن زبیر رضی اللہ عنہ فرماتے ہیں کہ وہ اس چیز کے زیادہ مستحق اور لائق ہیں جس کو چیز کو وہ دیکھیں اور اس کے متعلق ان سے سوال کیا جائے تو وہ گواہی دیں، اور حضرت ابن ابی ملیکہ رحمہ اللہ فرماتے ہیں کہ میں نے قاضیوں کو نہیں دیکھا کہ وہ حضرت ابن زبیر رضی اللہ عنہ کے قول کے علاوہ کسی کا قول لیتے ہوں۔

بچوں کی گواہی بڑوں کے خلاف جائز نہیں اور بچوں کی گواہی بچوں کے خلاف جائز ہے جب ان کے درمیان کوئی لڑائی، تفرقہ ہوجائے۔

حضرت شریح رحمہ اللہ بچوں کی گواہی دانت اور موضحہ زخم میں جائز سمجھتے تھے اور اس کے علاوہ ان کی گواہی قبول نہیں کرتے تھے۔

حضرت مکحول رحمہ اللہ فرماتے ہیں کہ جب بچے کی عمر پندرہ برس ہوجائے، تو اس کی گواہی معتبر (جائز) ہے۔

حضرت داؤد بن حصین رحمہ اللہ سے مروی ہے کہ مدینہ منورہ کے قاضیوں میں سے ایک قاضی کے پاس ایک بچے نے گواہی دی، جس کا نام سلمہ بن عبد الرحمن المخزومی تھا۔ حضرت سالم رحمہ اللہ اور حضرت قاسم رحمہ اللہ سے اس کی گواہی کے متعلق دریافت کیا گیا ؟ آپ رحمہ اللہ نے فرمایا کہ اگر اس کے زیر ناف کچھ بال آ چکے ہیں تو اس کی گواہی معتبر ہے۔

حضرت ابن سیرین بچوں کی گواہی کے متعلق فرماتے ہیں کہ ان کی گواہی لکھ لی جائے گی اور اس کی تحقیق اور چھان بین کی جائے گی۔

حضرت حمید بن عبد الرحمن رحمہ اللہ فرماتے ہیں کہ تحقیق کی جائے گی۔

حضرت ابن عباس رضی اللہ عنہما ارشاد فرماتے ہیں کہ بچوں کی گواہی معتبر نہیں ہے۔

حضرت عطاء رحمہ اللہ فرماتے ہیں بڑے ہونے سے پہلے بچوں کی گواہی معتبر نہیں ہے۔

حضرت عامر رحمہ اللہ بچوں کی گواہی کو جائز نہ سمجھتے تھے۔

سلیمان الھمدانی رحمہ اللہ فرماتے ہیں کہ جب میں چھوٹا تھا تو میں نے حضرت شریح رحمہ اللہ کے سامنے گواہی دی، آپ رحمہ اللہ نے میرے کچھ جسم کو انگلی سے چھو کر فرمایا : بالغ ہونے سے قبل گواہی معتبر نہیں۔

حضرت وکیع رحمہ اللہ فرماتے ہیں کہ حضرت ابن ابی لیلی رحمہ اللہ کے پاس محلّے کے کچھ بچوں نے گواہی دی جو نابالغ تھے، آپ رحمہ اللہ نے فرمایا : فلاں، فلاں کی گواہی لکھ لو ، جب بالغ ہوجائیں تو دیکھنا کہ اگر اس پر ثابت اور برقرار ہیں تو گواہی معتبر ہے اور اگر رجوع کرلیں تو وہ گواہی کالعدم ہوگی۔

حضرت شعبی رحمہ اللہ بچوں کی گواہی معتبر سمجھتے تھے۔

حضرت شریح رحمہ اللہ نے باندی کے معاملہ میں بچے کی گواہی کو قبول کیا اور چار ہزار دراہم کا فیصلہ سنایا۔

حضرت علی رضی اللہ عنہ بچوں کی گواہی بچوں کے بارے میں جائز سمجھتے تھے۔