مصنف ابن ابي شيبه

حضرت خالد الحذائ رحمہ اللہ فرماتے ہیں کہ میں نے حضرت ابو قلابہ رحمہ اللہ سے دریافت کیا کہ کیا معلم تعلیم دے کر اس پر اجرت لے سکتا ہے ؟ آپ رحمہ اللہ نے فرمایا کہ اگر وہ اجرت لے تو اس میں کوئی حرج نہیں۔

حضرت طاؤس فرماتے ہیں کہ معلم تعلیم دے اور ( اجرت) کی شرط نہ لگائے اگر اس کو کچھ دے دیا جائے تو اس کے لینے میں کوئی حرج نہیں۔

حضرت شعبی رحمہ اللہ فرماتے ہیں کہ معلم شرط نہ لگائے اور اگر اس کو کچھ دیا جائے تو اس کو قبول کرلینا چاہیئے۔

حضرت عطاء رحمہ اللہ معلم کے اجرت لینے پر کوئی حرج نہیں سمجھتے اگر اس نے اس کی شرط نہ لگائی ہو۔

حضرت وضین بن عطاء رحمہ اللہ فرماتے ہیں کہ مدینہ منورہ میں تیس معلمین بچوں کو تعلیم دینے پر مأمور تھے، حضرت عمر بن خطاب رضی اللہ عنہان میں سے ہر ایک معلم کو ماہانہ پندرہ ( درہم یا دینار) وظیفہ دیا کرتے تھے۔

ابراہیم رحمہ اللہ اس بات کو ناپسند کرتے تھے کہ معلم تعلیم قرآن پر اجرت لینے کی شرط لگائے۔

حضرت ابو جعفر رحمہ اللہ معلم کے لئے اجرت کی شرط لگانے کو ناپسند فرماتے تھے۔

حسن رحمہ اللہ فرماتے ہیں کہ معلم اگر کتابت پر کچھ اجرت لے لے تو اس میں کوئی حرج نہیں، لیکن شرط لگانے کو ناپسند کرتے تھے۔

حضرت طاؤس رحمہ اللہ معلم کے اجرت کی شرط لگانے کو ناپسند کرتے تھے۔

حضرت حکم رحمہ اللہ فرماتے ہیں کہ میرے علم میں یہ بات نہیں ہے کہ کسی نے بھی معلم کے اجر لینے کو ناپسند کیا ہو۔

حضرت معاویہ بن قرہ رحمہ اللہ فرماتے ہیں کہ اللہ تعالیٰ کی رحمت سے امید قوی ہے کہ اللہ پاک اس کو ضرور اجر عطاء فرمائے گا، وہ بچوں کو تعلیم اور ادب سیکھائے۔

حضرت عامر رحمہ اللہ فرماتے ہیں کہ معلم شرط تو نہ لگائے، ہاں اگر اس کو کچھ ہدیہ دیا جائے تو اس کو قبول کرلینا چاہیئے۔

حضرت ابن سیرین رحمہ اللہ فرماتے ہیں کہ مدینہ منورہ میں ایک معلم تھے اس کے پاس اس بڑے آدمی ( سخی) کے بچے بھی پڑھتے تھے ۔ وہ نیروز اور مہرجان میں اس معلم کے حق کو سمجھتے تھے۔