مصنف ابن ابي شيبه

حضرت عطاء فرماتے ہیں کہ اگر راہن اور مرتہن کا اختلاف ہوجائے، ایک دس کہے اور دوسرا بیس تو راہن کا قول معتبر ہوگا۔

حضرت عطاء فرماتے ہیں کہ اختلاف کی صورت میں مرتہن کا قول معتبر ہوگا۔

حسن فرماتے ہیں کہ جس کے قبضے میں رہن ہو اس کا قول معتبر ہوگا۔

حضرت ایاس بن معاویہ فرماتے ہیں کہ اختلاف کی صورت میں مرتہن کا قول معتبر ہوگا، البتہ اگر اس کے خلاف دلیل قائم ہوجائے تو پھر ا س کا قول معتبر نہیں ہوگا، اور ہر وہ شخص جس کے قبضہ میں چیز ہو اس کا قول معتبر ہوگا۔

حضرت قتادہ فرماتے ہیں کہ جب راہن اور مرتہن کا اختلاف ہوجائے تو پھر مرتہن کا قول معتبر ہوگا، اگر قیمت والی چیز میں اضافے کا اختلاف ہو تو راہن کا قول معتبر ہوگا۔

ابراہیم فرماتے ہیں کہ جب راہن اور مرتہن کا اختلاف ہوجائے تو راہن کا قول معتبر ہوگا البتہ اگر مرتہن دلیل قائم کر دے تو اس کی بات مانی جائے گی۔

حضرت عامر فرماتے ہیں کہ اگر رہن کی حیثیت میں راہن اور مرتہن کا اختلاف ہوجائے تو رہن کا دعویٰ کرنے والے پر گواہی لازم ہوگی۔

حضرت سعید بن جبیر فرماتے ہیں کہ اختلاف کی صورت میں مرتہن کا قول معتبر ہوگا۔

حضرت حماد سے سوال کیا گیا کہ جس شخص کے قبضے میں رہن ہے وہ کہتا ہے کہ یہ دس درہم کا ہے اور اس کا مالک کہتا ہے کہ یہ ایک درہم کا ہے ، اس صورت میں کیا حکم ہے ؟ انہوں نے فرمایا کہ زیادتی کا دعویٰ کرنے والے پر گواہی لازم ہے جیسا کہ اگر ایک رہن کا دعویٰ کرنے اور دوسرا امانت کا اور مالک کا قول معتبر ہوگا۔

حضرت زہری فرماتے ہیں کہ مرتہن کا قول معتبر ہوگا۔