مصنف ابن ابي شيبه

حضرت سعید بن مسیب فرماتے ہیں کہ حضرت عمر رضی اللہ عنہ نے نامرد کو ایک سال کی مہلت دی۔ اور فرمایا کہ اگر وہ ایک سال میں جماع کے قابل ہوجائے تو ٹھیک ورنہ دونوں کے درمیان جدائی کرادی جائے گی اور عورت کو پورا مہر ملے گا۔

حضرت شریح اس نامرد کے بارے میں جو اپنی بیوی سے جماع پر قادر نہ ہوسکا فرماتے تھے کہ اسے آدھا مہر دینا ہوگا۔

ابراہیم فرماتے ہیں کہ نامرد پر پورا مہر لازم ہوگا۔

حضرت عطاء فرماتے ہیں کہ نامرد پر پورا مہر لازم ہوگا۔

حضرت سعید بن مسیب اور حسن فرماتے ہیں کہ حضرت عمر رضی اللہ عنہ نے نامرد کو ایک سال کی مہلت دینے کو کہا اور پھر اگر وہ جماع پر قادر ہوجائے تو ٹھیک ورنہ دونوں کے درمیان جدائی کرادی جائے گی۔ اور عورت کو پورا مہر ملے گا۔

حضرت سعید بن مسیب فرماتے ہیں کہ نامرد کی عورت کو پورا مہر ملے گا۔

حضرت عروہ فرماتے ہیں کہ عورت کو پورا مہر ملے گا۔

حضرت طاوس فرماتے ہیں نامرد کی بیوی کو آدھا مہر ملے گا۔