مصنف ابن ابي شيبه

حضرت ابن عمر رضی اللہ عنہما سے دریافت کیا گیا کہ محرم کس چیز کو مار سکتا ہے ؟ آپ نے فرمایا مجھ سے آپ صلی اللہ علیہ وآلہ وسلم کی ازواج میں سے ایک نے بیان کیا ہے کہ نبی کریم صلی اللہ علیہ وآلہ وسلم نے کوے کے مارنے کا حکم فرمایا ہے۔

حضرت علی رضی اللہ عنہ فرماتے ہیں کہ محرم کوے کو مار سکتا ہے۔

حضرت ابن ابو عمارہ فرماتے ہیں کہ میں نے حضرت ابن عمر رضی اللہ عنہما کو حالت احرام میں دیکھا آپ اونٹ کی پشت پر سوار ہو کر کوّے کو مار رہے تھے۔

حضرت سوید بن غفلہ فرماتے ہیں کہ حضرت عمر نے ہمیں کوے اور بھڑ کو مارنے کا حکم دیا حالانکہ ہم حالت احرام میں تھے۔

حضرت سعید بن جبیر فرماتے ہیں کہ کوے کو مارسکتے ہو اس حال میں کہ تم حالت احرام میں ہو۔

حضرت حصین فرماتے ہیں کہ میں نے حضرت مجاہد سے دریافت کیا کہ محرم کن چیزوں کو مار سکتا ہے ؟ آپ نے فرمایا سانپ اور کوے کو مار سکتا ہے۔

حسن فرماتے ہیں کہ محرم کوے کو مار سکتا ہے۔

حضرت عطاء فرماتے ہیں کہ کوے کو مارا جائے گا۔

حضرت عائشہ رضی اللہ عنہا سے مروی ہے کہ نبی کریم صلی اللہ علیہ وآلہ وسلم نے ارشاد فرمایا چاہئے کہ محرم کوے کو مارے۔