مصنف ابن ابي شيبه

حضرت ابن عمر رضی اللہ عنہما عید الاضحی کی نماز پڑھے بغیر منیٰ میں قربانی کرتے تھے۔

حضرت لیث فرماتے ہیں کہ میں نے حضرت عطاء سے دریافت کیا کہ حضرت عبد الکریم نے منیٰ میں مجھ سے فرمایا کہ نماز ادا کرنے سے پہلے قربانی نہ کریں ؟ حضرت عطاء نے ارشاد فرمایا کہ پابندی منی والوں کے لیے ضروری نہیں بلکہ باہر سے آنے والوں کے لیے ہے۔ راوی فرماتے ہیں کہ میں نے حضرت مجاہد سے دریافت کیا ؟ آپ نے بھی حضرت عطاء کی طرح ارشاد فرمایا۔

حضرت عبد الملک فرماتے ہیں کہ میں نے حضرت عطاء سے دریافت کیا کہ مجھ سے ایک شخص نے کہا ہے کہ قربانی کرنے سے پہلے عید کی نماز ادا کرلو ؟ حضرت عطاء نے فرمایا کہ منیٰ والوں پر عید کی نماز نہیں ہے، ان کی نماز تو منیٰ میں ٹھہرنا ہی ہے۔

حضرت مجاہد، حضرت عطاء ، حضرت طاؤس، حضرت سالم اور حضرت قاسم فرماتے ہیں کہ قربانی والے دن منیٰ میں عید کی نماز نہیں ہے۔

ابراہیم اور حضرت عبد الرحمن بن الاسود نے منیٰ میں قربانی سے قبل عید کی دو رکعتیں ادافرمائیں۔

حضرت سعید بن المسیب فرماتے ہیں کہ جو شخص قربانی کر رہا ہے اس پر قربانی سے پہلے عید کی دو رکعتیں واجب ہیں، اور جو قربانی نہیں کر رہا اس پر لازم ہے کہ وہ منیٰ میں حاضر ہو، اور ان کا گمان تھا کہ انہوں نے عید الفطر اور عید الاضحی کی نماز سے قبل سجدہ نہیں کیا۔