مصنف ابن ابي شيبه

حضرت عبد الرحمن بن عوف نبی کریم صلی اللہ علیہ وآلہ وسلم کے ساتھ طواف فرما رہے تھے، حضور صلی اللہ علیہ وآلہ وسلم نے آپ سے فرمایا : کتنے چکر ہوگئے ہیں ؟ پھر (بعد میں) فرمایا کہ میں نے تجھ سے اس لیے پوچھا تھا تاکہ تو اچھی طرح یاد کرلے (چکروں کو) ۔

حضرت عبد اللہ بن عمر رضی اللہ عنہما سے صفا ومروہ کی سعی کے متعلق دریافت کیا گیا ؟ آپ نے سوال کرنے والے سے فرمایا : صفا سے چکر (سعی) شروع کر اور مروہ پر ختم کر اور اگر چکروں کے بھول جانے کا اندیشہ ہو تو اپنے ساتھ چھوٹے پتھر یا کنکریاں لے لو اور ایک کنکری صفا پر اور دوسری کنکری مروہ پر ڈال دو (اس طرح گننے میں آسانی ہوگی) ۔

حضرت سعید بن جبیر نے ایک خاتون کو دیکھا جو طواف کر رہی تھی اور اس کے ہاتھ میں کنکریاں تھیں جن سے وہ (طواف کے چکروں کو شمار کر رہی تھی) آپ نے اس کے ہاتھ پر (زور سے) مارا۔

ابراہیم فرماتے ہیں کہ جب ہم طواف کے چکر لگاتے تو ہمارے پاس انگوٹھیاں ہوتیں جن کو ہم اپنی انگلیوں میں ڈال کر شمار کرتے۔