مصنف ابن ابي شيبه

حضرت عطاء ارشاد فرماتے ہیں کہ وقوف عرفہ کی سہ پہر ظہر وعصر کی نماز میں بلند آواز سے قراءت نہیں کی جائے گی۔

حضرت ابن جریج سے مروی ہے کہ حضرت ابراہیم بن ہشام وقوف عرفہ میں جمعہ کے دن کھڑے ہوئے اور بلند آواز سے قراءت (شروع) کی، حضرت سالم نے اپنے ہاتھ سے (اشارہ کر کے) فرمایا : اوئے ! خاموش ہوجا۔

حضرت مجاہد یا حضرت طاؤس فرماتے ہیں کہ امام وقوف عرفہ کی سہ پہر اگرچہ وہ جمعہ کے دن ہی کیوں نہ ہو بلند آواز سے قراءت نہیں کرے گا۔

حضرت زہری سے بھی اسی طرح مروی ہے اور فرماتے ہیں کہ یہی حضرت سفیان کی رائے ہے۔

حضرت زہری فرماتے ہیں کہ امام وقوف عرفہ میں ظہر وعصر کی نمازوں میں قراءت جہراً نہیں کرے گا۔