مصنف ابن ابي شيبه

حضرت سلیمان بن عمرو بن الاحوص الازدی کی والدہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : تم میں سے بعض، بعض کو قتل نہ کریں، جب تم جمرہ کو کنکری مارو تو چھوٹی کنکری کے مثل مارو۔

حضرت جابر سے مرفوعاً مروی ہے کہ آپ صلی اللہ علیہ وآلہ وسلم نے ارشاد فرمایا : جمرات کو بالکل چھوٹی کنکری کے مثل مارو۔

حضرت محمد بن ابراہیم اپنی قوم کے ایک شخص سے روایت کرتے ہیں کہ نبی کریم صلی اللہ علیہ وآلہ وسلم نے لوگوں کو مناسک حج سکھلائے، پھر آپ صلی اللہ علیہ وآلہ وسلم نے ارشاد فرمایا : کہ جمرہ کو چھوٹی کنکری کے مثل کنکر سے مارو۔

حضرت جابر فرماتے ہیں کہ جمرہ کو چھوٹی کنکریاں مارو۔

حضرت طاؤس فرماتے ہیں کہ ہم لوگ حج میں باکل چھوٹی کنکری مارا کرتے تھے۔

حضرت ابن جریج فرماتے ہیں کہ میں نے حضرت عطاء سے جمرہ کو کنکری مارنے کے متعلق دریافت کیا ؟ آپ نے فرمایا : دو کنکریوں کے درمیان والی کنکری، میں نے عرض کیا وہ کتنی ہو ؟ آپ نے فرمایا بالکل چھوٹی سی۔

حضرت عبید بن عمیر فرماتے ہیں کہ جس کنکری سے رمی کی جائے وہ بالکل چھوٹی سی ہو۔

حضرت فضل بن عباس سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : جمرہ کو رمی چھوٹی کنکری سے مارو۔

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے جمرہ کی رمی کی صبح مجھ سے فرمایا : میرے لیے کنکریاں اکٹھی کرو، حضرت ابن عباس رضی اللہ عنہما فرماتے ہیں میں نے آپ کے لیے چھوٹی چھوٹی کنکریاں اکٹھی کیں، آپ صلی اللہ علیہ وآلہ وسلم نے فرمایا : اس جتنی کنکریوں سے رمی کرو، پھر فرمایا : دین میں غلو کرنے سے بچو۔