مصنف ابن ابي شيبه

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وآلہ وسلم ، حضرت ابو بکر، حضرت عمر اور حضرت عثمان نے عمرہ کا حج کے ساتھ اتصال فرمایا : اور سب سے پہلے حضرت معاویہ نے اس سے منع فرمایا۔

حضرت عمر ارشاد فرماتے ہیں کہ اگر میں عمرہ کروں پھر دوبارہ عمرہ کروں پھر حج کروں تو البتہ میں تمتع کرنے والا ہوں۔

حضرت ابن عمر رضی اللہ عنہما اور حضرت ابن عباس رضی اللہ عنہما تمتع کرتے ہوئے تشریف لاتے۔

حضرت غنیم بن قیس فرماتے ہیں کہ میں نے حضرت سعد سے عمرہ کا حج سے اتصال کرنے کے متعلق دریافت کیا ؟ آپ نے ارشاد فرمایا ہم تو اس طرح کرتے تھے، لیکن یہ شخص (حضرت معاویہ) رب کعبہ کی قسم اس کا انکار کرتا ہے۔

حضرت ابن عمر رضی اللہ عنہما ، حضرت ابن زبیر، حضرت جابر بن زید، حضرت ابو العالیہ اور حسن عمرہ کے حج سے اتصال کا حکم فرماتے تھے۔

حضرت طاؤس فرماتے ہیں کہ مکمل حج وہ ہے جس سے پہلے عمرہ ہو۔

حضرت شعیب بن الحبحاب فرماتے ہیں کہ حضرت ابو العالیہ نے مجھے حج تمتع کرنے کا حکم فرمایا۔

حضرت عطاء تمتع کا حکم فرماتے تھے۔

حضرت سعید بن جبیر ارشاد فرماتے ہیں کہ تو کہاں تھا تمتع سے ؟ تو دو سفر کو ایک سفر میں بنا۔

حضرت مجاہد فرماتے ہیں کہ اگر میں اپنے شہر کوفہ سے سفر حج کروں تو ہر حج کے ساتھ عمرہ کروں گا، راوی کہتے ہیں کہ میں نے عرض کیا کیا میں قران کرلوں ؟ آپ نے فرمایا نہیں، اس کو الگ (حج سے علیحدہ) عمرہ بنا۔

حسن عمرہ حج سے پہلے کرنا ضروری سمجھتے تھے اگرچہ کوئی شخص دس مرتبہ حج کرے۔

حضرت ضحاک فرماتے ہیں کہ اگر میں اسّی حج کروں تو البتہ میں ہر حج کے ساتھ عمرہ بھی کروں گا۔

حضرت مجاہد فرماتے ہیں کہ میں نے چالیس حج ادا کیے ہیں، میں نہیں نکلا حج کر کے مگر متمتع بن کر۔

حضرت مالک بن دینار فرماتے ہیں کہ میں نے آٹھ لوگوں سے عمرہ کے حج سے اتصال کے متعلق دریافت کیا ؟ ان سب نے مجھے اس کا حکم دیا، وہ آٹھ حضرات یہ ہیں، حسن، حضرت عطاء ، حضرت طاؤس، حضرت جابر بن زید، حضرت سالم بن عبد اللہ، حضرت عکرمہ، حضرت مجاہد اور حضرت قاسم۔