مصنف ابن ابي شيبه

حضرت جابر بن عبد اللہ رضی اللہ عنہ سے مروی ہے کہ ایک شخص نبی کریم صلی اللہ علیہ وآلہ وسلم کی خدمت میں حاضر ہوا اور عرض کیا، اے اللہ کے رسول (صلی اللہ علیہ وآلہ وسلم) ! مجھے بتائیں کہ کیا عمرہ کرنا واجب ہے ؟ آپ صلی اللہ علیہ وآلہ وسلم نے ارشاد فرمایا : نہیں، بہر حال تو عمرہ کر یہ تیرے لیے بہتر ہے۔

حضرت ابو صالح سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : حج کرنا جہاد کرنے کے برابر ہے اور عمرہ کرنا نفلی عبادت ہے۔

حضرت عبد اللہ فرماتے ہیں کہ حج کرنا فرض اور ضروری ہے، اور عمرہ کرنا نفلی عبادت ہے۔

حضرت شعبی فرماتے ہیں کہ یہ نفلی کام ہے۔

حضرت شعبہ فرماتے ہیں کہ میں نے حضرت حماد سے دریافت کیا کہ کیا عمرہ کرنا واجب ہے ؟ آپ نے فرمایا اس کے حکم کے متعلق اختلاف کیا گیا ہے۔

ابراہیم فرماتے ہیں کہ عمرہ کرنا سنت ہے فرض نہیں ہے۔

حضرت شعبی نے تلاوت فرمائی { وَأَتِمُّوا الْحَجَّ } پھر سانس توڑا اور پھر فرمایا { وَالْعُمْرَۃُ لِلَّہِ }۔