مصنف ابن ابي شيبه

حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے دعا فرمائی کہ اے اللہ ! حلق کروانے والوں کی مغفرت فرما، صحابہ کرام نے عرض کیا اے اللہ کے رسول (صلی اللہ علیہ وآلہ وسلم) ! قصر کروانے والوں کے لیے ؟ آپ صلی اللہ علیہ وآلہ وسلم نے فرمایا : اے اللہ حلق کروانے والوں کی مغفرت فرما اور آپ صلی اللہ علیہ وآلہ وسلم نے تین بار یہی فرمایا : صحابہ کرام نے پھر عرض کیا اے اللہ کے رسول (صلی اللہ علیہ وآلہ وسلم) ! قصر کروانے والوں کے لیے ؟ آپ صلی اللہ علیہ وآلہ وسلم نے فرمایا : اور قصر کروانے والوں کی بھی مغفرت فرما۔

حضرت وھب بن عبد اللہ اپنے والد سے روایت کرتے ہیں کہ میں اپنے والد صاحب کے ساتھ تھا، میں نے نبی کریم صلی اللہ علیہ وآلہ وسلم کو دیکھا کہ آپ صلی اللہ علیہ وآلہ وسلم ہاتھ اٹھا کر دعا کر رہے ہیں کہ اے اللہ حلق کروانے والوں پر رحم فرما، ایک شخص نے عرض کیا اے اللہ کے رسول (صلی اللہ علیہ وآلہ وسلم) ! قصر کروانے والوں پر ؟ آپ صلی اللہ علیہ وآلہ وسلم نے تیسری مرتبہ ارشاد فرمایا : اور قصر کروانے والوں پر بھی۔

حضرت ابو سعید الخدری سے اسی طرح مروی ہے۔

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے یوں دعا فرمائی، اے اللہ ! حلق کروانے والوں کی مغفرت فرما، تین بار یہی ارشاد فرمایا : صحابہ کرام نے عرض کیا کہ اے اللہ کے رسول (صلی اللہ علیہ وآلہ وسلم) ! کیا وجہ ہے کہ حلق کروانے والوں پر رحم کا اظہار کیا گیا ہے ؟ آپ صلی اللہ علیہ وآلہ وسلم نے فرمایا کیونکہ وہ دکھ درد کا اظہار نہیں کرتے اور امتثال امر میں جلدی کرنے والے ہیں۔

حضرت ابن عمر رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : اللہ پاک حلق کروانے والوں پر رحم فرمائے، صحابہ کرام نے عرض کیا اے اللہ کے رسول (صلی اللہ علیہ وآلہ وسلم) ! قصر کروانے والوں پر بھی ؟ آپ صلی اللہ علیہ وآلہ وسلم نے تیسری بار ارشاد فرمایا : اور قصر کرنے والوں پر بھی رحم فرما۔

حضرت یحییٰ بن حصین اپنے دادا سے روایت کرتے ہیں کہ انھوں نے رسول اکرم (صلی اللہ علیہ وآلہ وسلم) سے حلق کروانے والوں کے لیے تین بار دعا سنی اور قصر کروانے والوں کے لیے ایک دفعہ۔

حضرت حبشی بن جنادہ سے مروی ہے کہ نبی کریم صلی اللہ علیہ وآلہ وسلم نے دعا فرمائی، اے اللہ ! حلق کروانے والوں کی مغفرت فرما، صحابہ کرام نے عرض کیا، اے اللہ کے رسول (صلی اللہ علیہ وآلہ وسلم) ! قصر کروانے والوں کے لیے بھی ؟ آپ صلی اللہ علیہ وآلہ وسلم نے فرمایا : اے اللہ ! حلق کروانے والوں کی مغفرت فرما، صحابہ کرام نے عرض کیا اے اللہ کے رسول (صلی اللہ علیہ وآلہ وسلم) ! قصر کروانے والوں کے لیے بھی ؟ آپ صلی اللہ علیہ وآلہ وسلم نے ارشاد فرمایا : قصر کروانے والوں کی بھی مغفرت فرما۔

حضرت مالک بن ربیعہ سے مروی ہے کہ نبی کریم صلی اللہ علیہ وآلہ وسلم نے دعا فرمائی، اے اللہ ! حلق کروانے والوں کی مغفرت فرما، صحابہ کرام نے عرض کیا اے اللہ کے رسول (صلی اللہ علیہ وآلہ وسلم) ! قصر کروانے والوں کے لیے بھی ؟ آپ صلی اللہ علیہ وآلہ وسلم نے فرمایا اور قصر کروانے والوں کی بھی مغفرت فرما، راوی فرماتے ہیں کہ اس دن میں محلوق الراس تھا، مجھے نبی کریم صلی اللہ علیہ وآلہ وسلم کی اس دعا کی وجہ سے سرخ اونٹوں یا بہت زیادہ اونٹوں کے مل جانے سے زیادہ خوشی محسوس ہوئی۔