مصنف ابن ابي شيبه

حضرت یزید بن ابو زیاد فرماتے ہیں کہ حضرت مجاہد اور حضرت سعید بن جبیر حضرت عطاء کے پاس محرم کا زعفران ملی ہوئی روٹی کھانے کے متعلق دریافت کرنے گئے ؟ حضرت عطاء نے اس کو ناپسند فرمایا : ان دونوں حضرات نے فرمایا : کسی نے اس بارے میں آپ سے حدیث روایت کی ہے ؟ حضرت عطاء نے فرمایا نہیں، تو ان دونوں حضرات نے وہ روٹی کھالی اور ان کے قول کی پرواہ نہ کی۔

حضرت خصیف فرماتے ہیں کہ میں نے حضرت مجاہد اور حضرت عطاء سے خشکنانج روٹی اور زرد حلوہ کے متعلق دریافت کیا ؟ آپ دونوں نے اس کو ناپسند فرمایا : راوی کہتے ہیں کہ میں نے پھر حضرت سعید بن جبیر سے دریافت کیا آپ نے فرمایا : کیا تو حالت احرام میں زیتون کا تیل استعمال کرتا ہے ؟ میں نے عرض کیا کہ نہیں، فرمایا : کیا تو حالت احرام میں گھی استعمال کرتا ہے ؟ میں نے عرض کیا کہ نہیں، آپ نے فرمایا کہ بیشک خشک نانج روٹی تو آگ میں پکائی جاتی ہے۔

حضرت جابر بن زید فرماتے ہیں کہ زرد روٹی جس میں زعفران ملا ہو اس کے محرم کے لیے استعمال کرنے میں کوئی حرج نہیں۔

حسن جب زرد حلوہ اور خشکنانج روٹی کو آگ میں بنایا جائے تو محرم کے لیے اس کے استعمال میں کوئی حرج نہیں سمجھتے۔

حضرت طاؤس اور حضرت عطاء محرم کے لیے زرد حلوہ استعمال کرنے میں کوئی حرج نہیں سمجھتے اور فرماتے ہیں کہ جو چیز آگ میں پکی ہو اس کے استعمال میں کوئی حرج نہیں ہے۔

حضرت طاؤس فرماتے ہیں کہ محرم کے لیے ایسا کھانا استعمال کرنے میں کوئی حرج نہیں جس میں زعفران ملا ہو۔

حضرت حکم محرم کے لیے زرد حلوہ اور زعفران ملی ہوئی روٹی کے استعمال کرنے کوئی حرج نہیں سمجھتے۔

حضرت اعمش کہتے ہیں کہ ابراہیم کے سامنے ذکر کیا گیا کہ حضرت مغیرہ محرم کے لیے زرد زعفران ملی ہوئی روٹی استعمال کرنے کو ناپسند سمجھتے تھے، ابراہیم یہ سن کر ان پر تعجب کرنے لگے۔

حضرت اسود نے حالت احرام میں زرد زعفران ملی ہوئی روٹی استعمال کی، اور حضرت ابو جعفر زعفران ملا ہوا کھانا استعمال کرنے میں کوئی حرج نہیں سمجھتے تھے۔

حضرت عروہ بن زبیر نے اس کو ناپسند فرمایا : پھر اس کے استعمال کرنے میں کوئی حرج نہ سمجھا۔

حضرت ابن عمر رضی اللہ عنہما محرم کے لیے زرد زعفران ملی ہوئی روٹی استعمال کرنے میں کوئی حرج نہیں سمجھتے۔