مصنف ابن ابي شيبه

حضرت ابو سعید الخدری سے مروی ہے کہ نبی کریم صلی اللہ علیہ وآلہ وسلم جب قسم پر بہت زور دیتے تو یوں فرماتے ، نہیں، قسم ہے اس ذات کی جس کے قبضہ میں ابو القاسم (صلی اللہ علیہ وآلہ وسلم) کی جان ہے۔

حضرت ابن عمر رضی اللہ عنہما فرماتے ہیں کہ نبی کریم صلی اللہ علیہ وآلہ وسلم کی قسم جس پر آپ قسم اٹھاتے وہ یہ تھی : نہیں دلوں کو پلٹنے والے کی قسم۔

حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم کی قسم یہ تھی : نہیں اور میں اللہ سے معافی مانگتا ہوں۔

حضرت عبد الرحمن بن اسود اپنے والد سے روایت کرتے ہیں کہ میں حضرت ابن مسعود کے ساتھ گھر کی چھت پر بیٹھا تھا سورج غروب ہونے لگا، حضرت عبد اللہ نے فرمایا : قسم ہے اس ذات کی جس کے بغیر کوئی معبود نہیں یہ وہ وقت ہے جب روزہ دار افطار کرتا ہے۔

حضرت عباد بن عبد اللہ فرماتے ہیں کہ حضرت علی رضی اللہ عنہ خطبہ دے رہے تھے آپ نے فرمایا : نہیں، قسم اس ذات کی جس نے دانے کو پھاڑ کر جاندار کو پیدا کیا۔

حضرت عبد اللہ بن عمرو رضی اللہ عنہ فرماتے ہیں کہ میں نے حضرت ابو ہریرہ رضی اللہ عنہ سے آپ فرماتے ہیں : لا (نہیں) اس کعبہ کے رب کی قسم۔

حضرت زیاد الحارثی فرماتے ہیں کہ ایک شخص نے حضرت ابو ہریرہ رضی اللہ عنہ سے دریافت کیا آپ ہیں جنہوں نے جمعہ کے دن روزہ رکھنے سے منع کیا ہے ؟ آپ نے فرمایا : نہیں اس حرم کے رب کی قسم، یا فرمایا اس کعبہ کے رب کی قسم۔

حضرت عبد الرحمن بن یزید فرماتے ہیں کہ حضرت عبد اللہ یوں قسم کھاتے : قسم ہے اس ذات کی جس کے سوا کوئی معبود نہیں۔

حضرت مسروق فرماتے ہیں کہ حضرت عائشہ رضی اللہ عنہا کسی چیز پر قسم اٹھاتیں تو یوں فرماتیں، نہیں، قسم ہے اس کی جس پر مؤمن ایمان لائے اور کافروں نے اس کا انکار کیا۔

حضرت رفاعہ الجہنی سے مروی ہے کہ نبی کریم صلی اللہ علیہ وآلہ وسلم جب قسم کھاتے تو یوں فرماتے : اس ذات کی قسم جس کے قبضہ میں محمد کی جان ہے۔