مصنف ابن ابي شيبه

حضرت عبد اللہ بن عمر رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : جب تم اپنے مردوں کو قبروں میں اتارو تو یہ دعا پڑھو : بِسْمِ اللہِ وَعَلَی سُنَّۃِ رَسُولِ اللہِ صَلَّی اللَّہُ عَلَیْہِ وَسَلَّمَ

حضرت عبد اللہ بن عمر رضی اللہ عنہما سے اسی کے مثل منقول ہے۔

حضرت عبد اللہ بن عمر رضی اللہ عنہما سے مروی ہے کہ نبی کریم صلی اللہ علیہ وآلہ وسلم جب میت کو قبر میں اتارتے تو یوں فرماتے : بِسْمِ اللہِ وَبِاللہِ وَعَلَی سُنَّۃِ رَسُولِ اللہِ ۔

حضرت ابو مدرک اشجعی فرماتے ہیں کہ حضرت عمر جب میت کو قبر میں اتارتے تو فرماتے اور حضرت ابو الاحوص فرماتے ہیں کہ جب اس پر مٹی برابر کرتے تو فرماتے : بِسْمِ اللّٰہِ إلَیْک الْمَالَ وَالأَہْلَ وَالْعَشِیرَۃَ وَالذَّنْبَ الْعَظِیمَ فَاغْفِرْ لَہُ ۔ اللہ کے نام کے ساتھ ، اے اللہ اس کا مال، اہل، خاندان اور گناہ تیرے حوالے ہیں۔ اس کی مغفرت فرما۔

حضرت خیثمہ فرماتے ہیں کہ صحابہ کرام جب میت کو قبر میں اتارتے تو وہ پسند فرماتے کہ یوں کہا جائے : بِسْمِ اللہِ وَفِی سَبِیلِ اللہِ وَعَلَی مِلَّۃِ رَسُولِ اللہِ ، اللَّہُمَّ أَجِرْہُ مِنْ عَذَابِ الْقَبْرِ ، وَعَذَابِ النَّارِ ، وَمِنْ شَرِّ الشَّیْطَانِ ۔ اللہ کے نام کے ساتھ، اللہ کے راستے میں، اللہ کے رسول کی ملت پر، اے اللہ اسے قبر کے عذاب سے، آگ کے عذاب سے اور شیطان کے شر سے محفوظ فرما۔

حضرت مجاہد جب میت کو قبر میں اتارتے تو فرماتے : بِسْمِ اللّٰہِ وَفِی سَبِیلِ اللّٰہِ ، اللَّہُمَّ افْسحْ لَہُ فِی قَبْرِہِ ، وَنَوِّرْ لَہُ فِیہِ ، وَأَلْحِقْہُ بِنَبِیَّہِ صَلَّی اللَّہُ عَلَیْہِ وَسَلَّمَ ، وَأَنْتَ عَنْہُ رَاضٍ غَیْرُ غَضْبَانَ ۔ اللہ کے نام کے ساتھ اور اللہ کے راستے میں، اے اللہ اس کی قبر کو کشادہ فرما، اس کی قبر کو روشن فرما، اسے اس کے نبی صلی اللہ علیہ وآلہ وسلم کے ساتھ ملا، اس سے خوش ہو اور ناراض نہ ہونا۔

ابراہیم التیمی فرماتے ہیں کہ جب تم میت کو قبر میں اتارو تو یوں کہو : بِسْمِ اللہِ ، وَإِلَی اللہِ ، وَعَلَی سُنَّۃِ رَسُولِ اللہِ صَلَّی اللَّہُ عَلَیْہِ وَسَلَّمَ ۔ ” اللہ کے نام کے ساتھ اور اللہ کے حوالے اور رسول اللہ صلی اللہ علیہ وآلہ وسلم کی سنت پر۔ “

ابراہیم فرماتے ہیں کہ جب میت کو قبر میں اتارو تو یوں کہو : بِسْمِ اللہِ ، وَعَلَی مِلَّۃِ رَسُولِ اللہِ صَلَّی اللَّہُ عَلَیْہِ وَسَلَّمَ ۔ ” اللہ کے نام کے ساتھ اور رسول اللہ صلی اللہ علیہ وآلہ وسلم کی ملت پر۔ “

حضرت قتادہ فرماتے ہیں کہ حضرت انس نے اپنے بیٹے کو دفن کیا تو یوں (دعا) کہا : جَافِ الأَرْضَ عَنْ جَنْبَیْہِ ، وَافْتَحْ أَبْوَابَ الْسَمَائِ لِرُوحِہِ ، وَأَبْدِلْہُ بِدَارِہِ دَارًا خَیْرًا مِنْ دَارِہِ ۔ ” اے اللہ ! زمین کو اس کے دونوں پہلوؤں سے الگ کر دے، اس کی روح کے لیے آسمان کے دروازے کھول دے اور اسے اس گھر سے بہتر گھر عطا فرما۔ “

حضرت العلاء بن المسیب اپنے والد سے روایت کرتے ہیں کہ جب میت کو قبر میں اتارو تو بسم اللہ مت کہو بلکہ یہ پڑھو : ” اللہ کے راستے میں اور رسول اللہ صلی اللہ علیہ وآلہ وسلم کی سنت پر، ابراہیم کی ملت پر جو کہ یکسو مسلمان تھے اور مشرکین میں سے نہیں تھے۔ اے اللہ ! اسے آخرت میں قول ثابت کے ساتھ تقویت عطا فرما۔ اے اللہ ! اسے پہلے سے زیادہ بھلائی عطا فرما، اے اللہ ہمیں اس کے اجر سے محروم نہ فرما اور ہمیں اس کے بعد فتنے میں مبتلا نہ فرما “ اور فرماتے قرآن پاک کی یہ آیت { یُثَبِّتُ اللّٰہُ الَّذِیْنَ اٰمَنُوْا بِالْقَوْلِ الثَّابِتِ فِی الْحَیٰوۃِ الدُّنْیَا وَ فِی الْاٰخِرَۃِ } صاحب قبر کے بارے میں نازل ہوئی ہے۔

حضرت ابن عون فرماتے ہیں کہ میں نے محمد سے دریافت کیا کہ جب میں میت کو قبر میں اتاروں تو کیا کہوں ؟ آپ نے فرمایا کچھ نہیں۔

حضرت عاصم بن حمزہ فرماتے ہیں کہ حضرت علی رضی اللہ عنہ کرم اللہ وجہہ سوتے وقت اور میت کو قبر میں اتارتے وقت یوں فرماتے : بِسْمِ اللہِ وَفی سَبِیلِ اللہِ ، وَعَلَی مِلَّۃِ رَسُولِ اللہِ صَلَّی اللَّہُ عَلَیْہِ وَسَلَّمَ ۔ ” اللہ کے نام کے ساتھ، اللہ کے راستے میں اور رسول اللہ صلی اللہ علیہ وآلہ وسلم کی ملت پر۔ “