مصنف ابن ابي شيبه

حضرت عبد اللہ بن عمر رضی اللہ عنہما ارشاد فرماتے ہیں کہ نماز جنازہ کی جو تکبیریں فوت ہوجائیں ان کی وہ قضا نہیں کرے گا۔

ابراہیم فرماتے ہیں کہ جب نماز جنازہ کی ایک دو تکبیریں فوت ہوجائیں تو اٹھنے سے قبل ان تکبیروں کو جلدی سے کہہ لے۔

حضرت سعید بن المسیب فرماتے ہیں کہ نماز جنازہ کی جو تکبیریں فوت ہوجائیں ان کی بنا (قضا) کرے گا۔

محمد فرماتے ہیں کہ جتنی تکبیریں مل جائیں وہ ادا کرے اور جو گزر چکی ہیں ان کی قضا کرے ۔ اور حسن فرماتے ہیں جو مل جائیں وہ تو کہہ لے لیکن جو رہ گئی ہیں ان کی قضا نہ کرے۔

حضرت شعبی اور حضرت عطاء فرماتے ہیں کہ جو تکبیرات فوت ہوجائیں ان کی قضا نہیں ہے۔

حضرت حماد فرماتے ہیں قضا کرے گا۔

حضرت قتادہ فرماتے ہیں کہ جتنی تکبیریں مل جائیں ان کو کہہ لے اور جو فوت ہوگئی ہیں ان کی قضا نہ کرے۔

حضرت حمید بن عبد الرحمن فرماتے ہیں نماز جنازہ کی جتنی تکبیریں فوت ہوگئی ہیں ان کی قضاء کرے۔