مصنف ابن ابي شيبه

حضرت سالم اور حضرت ابن حنفیہ فرماتے ہیں کہ اللہ تعالیٰ کے قول { وَآتُوا حَقَّہُ یَوْمَ حَصَادِہِ } کو عشر اور نصف عشر نے منسوخ کردیا ہے۔

ابراہیم فرماتے ہیں کہ اس آیت کو عشر اور نصف عشر نے منسوخ کردیا ہے۔

حضرت ابو العالیہ فرماتے ہیں کہ صحابہ کرام صدقات کے علاوہ بھی لوگوں کو عطا فرمایا کرتے تھے۔

حضرت جابر بن زید فرماتے ہیں کہ قرآن پاک کی آیت { وَآتُوا حَقَّہُ یَوْمَ حَصَادِہِ } سے مراد زکوٰۃ ہے۔

حضرت طاؤس اپنے والد سے روایت کرتے ہیں کہ اس سے مراد زکوٰۃ ہے۔

حضرت عبد اللہ بن عمر رضی اللہ عنہما فرماتے ہیں کہ { وَآتُوا حَقَّہُ یَوْمَ حَصَادِہِ } (اس آیت کے نزول کے بعد) صحابہ کرام صدقات اور زکوٰۃ کے علاوہ بھی کوئی طالب اور سائل آجاتا تو اس کو عطا فرماتے ۔

حضرت عطاء فرماتے ہیں کہ اللہ تعالیٰ کا قول { وَآتُوا حَقَّہُ یَوْمَ حَصَادِہِ } جو تیرے پاس اس دن حاضر ہو تو جو تیرے قبضہ میں ہے اس کو عطا کر دے اور یہ زکوٰۃ کے علاوہ ہے۔

حضرت مجاہد فرماتے ہیں کہ اللہ تعالیٰ کا ارشاد { وَآتُوا حَقَّہُ یَوْمَ حَصَادِہِ } جب تو کھیتی کاٹے اور تیرے پاس مسکین آئیں تو ان کیلئے بھی کچھ ڈالدے اور جب تو جمع کرے (کھیتی وغیرہ کو) تو ان کیلئے کچھ ڈال دے اور جب تو اس کو ڈھیر لگائے تو کچھ ان کے لیے ڈال دے اور جب تو اس کو صاف کرے اور کیل کرنے لگے تو کچھ (بھوسہ وغیرہ) ان کے لیے ڈال دے۔ اور جب تو کیل کرلے اور معلوم ہوجائے کہ کتنا ہے تو زکوٰۃ ادا کر اور جب تو کھجور کے درخت سے کھجور توڑے تو کچھ ہلکی اور پکی کھجوریں ان کیلئے چھوڑ دے اور جب ان کو کیل کرنے لگے تب بھی کچھ ان کیلئے ڈال دے اور جب اس کا وزن معلوم ہوجائے تو اس کی زکوٰۃ ادا کر۔ (١٠٥٨٠ م) حضرت ضحاک سے اس آیت کی تفسیر میں منقول ہے کہ اس کی زکوٰۃ کا حساب اس فصل کے کیل کرنے کے دن ہوگا۔

حضرت سدی فرماتے ہیں کہ یہ آیت مدنی اور مکی ہے۔ اس کو عشر اور نصف عشر نے منسوخ کردیا ہے۔ راوی کہتے ہیں کہ میں نے پوچھا کس نے منسوخ قرار دیا ہے ؟ آپ نے فرمایا فقہاء کرام نے۔

حضرت حماد اور ابراہیم فرماتے ہیں کہ قرآن پاک کی آیت { وَآتُوا حَقَّہُ یَوْمَ حَصَادِہِ } فرماتے ہیں ان کو جو میسر ہو خواہ وہ تھوڑا ہی کیوں نہ ہو وہ عطا کرتے ہیں۔

ابراہیم فرماتے ہیں کہ جو میسر ہو وہ عطا کرتے ہیں۔

حسن فرماتے ہیں کہ اس آیت کو زکوٰۃ نے منسوخ کردیا ہے۔

ضحاک فرماتے ہیں کہ زکوٰۃ نے قرآن پاک میں موجود تمام صدقات کو منسوخ کردیا۔

حضرت عطیہ فرماتے ہیں کہ اس آیت کو عشر اور نصف عشر نے منسوخ کردیا۔

حضرت ضحاک فرماتے ہیں کہ اللہ پاک کا کلام { وَآتُوا حَقَّہُ یَوْمَ حَصَادِہِ } فرماتے ہیں کہ اس سے مراد جس وقت کیل کرے اس کی زکوٰۃ ہے۔

حضرت ابن عباس رضی اللہ عنہما فرماتے ہیں کہ قرآن مجید کی آیت { وَآتُوا حَقَّہُ یَوْمَ حَصَادِہِ } کو عشر اور نصف عشر نے منسوخ کردیا ہے۔