مصنف ابن ابي شيبه

حضرت انس اور حسن فرماتے ہیں کہ : جو کچھ پلوں پر آپ سے وصول کیا گیا وہ ماضی کی زکوٰۃ شمار ہوگی۔

ابراہیم ارشاد فرماتے ہیں کہ جو عشر وصول کرنے والے آپ سے لیں اسکو بھی اپنے مال کی زکوٰۃ میں شمار کر۔

حضرت زبرقان سے مروی ہے وہ فرماتے ہیں کہ میں نے حضرت ابو رزین سے دریافت فرمایا کہ جو تاجروں سے عشر وصول کیا جاتا ہے (اس کا کیا حکم ہے ؟ ) آپ نے ارشاد فرمایا کہ اسکو زکوٰۃ میں شمار کیا جائے گا۔

ابراہیم اور حسن ارشاد فرماتے ہیں کہ جو مال عشر وصول کرنے والا آپ سے وصول کرے تو اسکو زکوٰۃ میں سے شمار کرو۔

حضرت منصور سے مروی ہے کہ ابراہیم فرماتے ہیں کہ اسکو زکوٰۃ میں شمار کیا جائیگا۔

حسن فرماتے ہیں کہ جب تو عاشر کے پاس سے گذرے اور وہ تجھ سے عشر وصول کرے تو اس کو زکوٰۃ میں شمار کر۔

حضرت سعید بن جبیر ارشاد فرماتے ہیں کہ اس مال کو بھی زکوٰۃ میں شمار کیا جائے گا۔

حضرت اسماعیل بن عبد الملک فرماتے ہیں کہ میں نے حضرت عطاء سے اس کے متعلق دریافت فرمایا ؟ آپ نے ارشاد فرمایا کہ جو عاشر وصول کرے اس کو بھی (زکوٰۃ) میں شمار کیا جائے گا۔