مصنف ابن ابي شيبه

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے حضرت سعد کو نماز مں دو انگلیوں سے دعا مانگتے دیکھا تو فرمایا کہ اے سعد ! ایک انگلی سے دعا مانگو، ایک انگلی سے دعا مانگو۔

حضرت ابن سیرین فرماتے ہیں کہ حضرت ابوہریرہ نے ایک آدمی کو شہادت کی دونوں انگلیوں سے دعا مانگتے دیکھا تو فرمایا کہ ایک انگلی سے اور داہنی انگلی سے دعا مانگو۔

حضرت سعید بن عبدا لرحمن بن ابزی فرماتے ہیں کہ نبی کریم صلی اللہ علیہ وآلہ وسلم جب نماز میں بیٹھتے تو اپنے ہاتھ کو اپنی ران پر رکھتے اور دعا میں انگلی سے اشارہ فرماتے ۔

حضرت ابن عباس رضی اللہ عنہما فرماتے ہیں کہ انگلی سے دعا مانگنا یہ اخلاص ہے۔

حضرت سلیمان بن ابی یحییٰ کہتے ہیں کہ نبی کریم صلی اللہ علیہ وآلہ وسلم کے صحابہ دعا میں انگلی سے اشارہ کیا کرتے تھے۔

حضرت مجاہد فرماتے ہیں کہ دعا میں انگلی سے اشارہ کرنا شیطان کو کوڑا مارنے کے مترادف ہے۔

حضرت عائشہ رضی اللہ عنہا فرماتی ہیں کہ اللہ تعالیٰ کو یہ بات پسند ہے کہ دعا میں یوں کیا جائے۔ یہ فرماکر انہوں نے ایک انگلی سے اشارہ فرمایا۔

حضرت کثیر ابن افلح کہتے ہیں کہ میں نے نماز پڑھی اور قعدہ ٔ اخیرہ میں شہادت کی دونوں انگلیوں کو اٹھایا۔ حضرت ابن عمر رضی اللہ عنہما نے میری بائیں انگلی کو پکڑ لیا۔

حضرت عطاء فرماتے ہیں کہ حضرت ابن عمر رضی اللہ عنہما نماز میں اپنی انگلی سے دعا کا اشارہ کیا کرتے تھے۔

حضرت طلحہ فرماتے ہیں کہ حضرت خیثمہ انگلی سے تریپن تک گنتے تھے اور انگلی سے نما زمین دعا کا اشارہ کیا کرتے تھے۔

حضرت ابن سیرین فرماتے ہیں کہ اسلاف جب کسی کو نماز میں دو انگلیوں سے اشارہ کرتے ہوئے دیکھتے تو ایک انگلی پر مارتے تھے اور فرماتے کہ معبود تو ایک ہے۔

ابراہیم فرماتے ہیں کہ اگر آدمی اپنی نماز میں ایک انگلی سے اشارہ کرے تو یہ اچھا ہے اور توحید کا اظہار ہے۔ البتہ دو انگلیوں سے اشارہ نہ کرے یہ مکروہ ہے۔

حضرت ہشام بن عروہ فرماتے ہیں کہ ان کے والد دعا میں انگلی سے اشارہ کرتے تھے اور اسے حرکت نہیں دیتے تھے۔

حضرت معبد بن خالد فرماتے ہیں کہ حضرت قیس بن سعد اس سے زیادہ نہیں کیا کرتے تھے ۔ یہ کہہ کر انہوں نے ایک انگلی سے اشارہ کیا۔

حضرت نمیر خزاعی فرماتے ہیں کہ میں نے نبی کریم صلی اللہ علیہ وآلہ وسلم کو نماز میں بیٹھے ہوئے دیکھا، آپ نے اپنا دایاں ہاتھ اپنی ران پر رکھا ہوا تھا اور انگلی سے اشارہ فرما رہے تھے۔

حضرت ابو صالح سے روایت ہے کہ رسول اللہ صلی اللہ علیہ وآلہ وسلم نے حضرت سعد کو نماز میں دو انگلیوں سے دعا مانگتے دیکھا تو فرمایا کہ اے سعد ! ایک انگلی سے دعا مانگو، ایک انگلی سے دعا مانگو۔

حضرت عبدا للہ بن زبیر فرماتے ہیں کہ نبی کریم صلی اللہ علیہ وآلہ وسلم جب قعدہ میں بیٹھتے تو اپنے دائیں ہاتھ کو اپنی دائیں ران پر رکھ کر دعا مانگتے اور بائیں ہاتھ کو اپنی بائیں ران پر رکھتے۔ آپ اپنی انگشتِ شہادت سے اشارہ فرماتے اور اپنے انگوٹھے کو اپنی درمیانی انگلی پر رکھتے اور اپنی بائیں ہتھیلی کو اپنے گھٹنے پر بچھا رہنے دیتے۔

حضرت وائل بن حجر کہتے ہیں کہ نبی کریم صلی اللہ علیہ وآلہ وسلم نے اپنی دائیں کہنی کے کنارے کو اپنی دائیں ران پر رکھا، پھر انگوٹھے اور درمیانی انگلی سے حلقہ بنایا اور پھر انگوٹھے کے ساتھ والی انگلی کو اٹھا کر دعا کی۔

حضرت ابو برزہ فرماتے ہیں کہ نبی کریم صلی اللہ علیہ وآلہ وسلم نے دو آدمیوں پر بددعا کرتے ہوئے ہاتھوں کو بلند فرمایا۔

حضرت عبدا لرحمن بن سمرہ فرماتے ہیں کہ نبی کریم صلی اللہ علیہ وآلہ وسلم نے دعا میں ہاتھوں کو بلند فرمایا۔