مصنف ابن ابي شيبه

حضرت ہشام فرماتے ہیں کہ میرے والد حضرت عروہ اپنی نماز میں حضرت زبیر کا نام لیتے اور ان کے لئے دعا کرتے تھے۔

حضرت ابو الدرداء فرماتے ہیں کہ میں سجدے کی حالت میں اپنے ستر بھائیوں کے لئے دعا کرتا ہوں۔

حضرت شعبی فرماتے ہیں کہ حضرت علی رضی اللہ عنہ نماز کے بعد کی دعا میں لوگوں کا نام لیا کرتے تھے۔

حضرت فضل بن عطیہ فرماتے ہیں کہ مجھے اس شخص نے بتایا جس نے عروہ بن زبیر کو دیکھا ہے کہ وہ نماز میں کہا کرتے تھے : اے اللہ ! زبیر کی مغفرت فرما، اے اللہ ! اسماء بنت ابی بکر کی مغفرت فرما۔

حسن اور حضرت شعبی فرماتے ہیں کہ اپنی نماز میں جس کے لئے تمہیں اچھا لگے دعا کرو۔

حضرت ابن عون فرماتے ہیں کہ مجھے بتایا گیا ہے کہ حضرت عمر بن عبد العزیز نے خط لکھا کہ دعا میں کسی کا نام نہ لیا جائے۔

حضرت فرافصہ کہتے ہیں کہ میں نے حضرت ابن زبیر کو سجدے کی حالت میں یہ کہتے سنا : اے اللہ ! زبیر کی مغفرت فرما، اے اللہ ! اسماء بنت ابی بکر کی مغفرت فرما۔

حضرت عطاء فرماتے ہیں کہ نماز میں یہ کہنے میں کوئی حرج نہیں کہ اے اللہ ! مجھے لڑکا عطا فرما۔ البتہ نام نہ لے۔