مصنف ابن ابي شيبه

حضرت معاذہ عدویہ کہتی ہیں کہ ایک عورت نے حضرت عائشہ رضی اللہ عنہا سے سوال کیا کہ کیا عورت حالت حیض کی نمازوں کی قضا کرے گی ؟ انہوں نے فرمایا کہ تو تو بالکل حروریہ ہے ! نبی صلی اللہ علیہ وآلہ وسلم کے زمانے میں ہم حیض میں مبتلا ہوتی تھیں لیکن حضور صلی اللہ علیہ وآلہ وسلم ہمیں حیض کے دنوں کی نمازوں کی قضا کا حکم نہ دیتے تھے۔

حضرت معاذہ عدویہ بیان کرتی ہیں کہ حضرت عائشہ رضی اللہ عنہا سے سوال کیا گیا کہ کیا عورت حالت حیض کی نمازوں کی قضا کرے گی ؟ انہوں نے فرمایا کہ نبی صلی اللہ علیہ وآلہ وسلم کی ازواج حیض میں مبتلا ہوتی تھیں اور ان دنوں کی نمازوں کی قضا نہیں کرتی تھیں۔

ابراہیم فرماتے ہیں کہ نبی صلی اللہ علیہ وآلہ وسلم کی صاحبزادیاں اور آپ کی ازواج مطہرات حیض میں مبتلا ہوتی تھیں، آپ انہیں روزوں کی قضا کا حکم دیتے تھے لیکن نمازوں کی قضا کا حکم نہیں فرماتے تھے۔

ابراہیم اور حضرت شعبی فرماتے ہیں کہ حائضہ نماز کی قضا نہیں کرے گی۔

حضرت مجاہد فرماتے ہیں کہ حائضہ نماز کی قضا نہیں کرے گی۔

حضرت کثیر نواء کہتے ہیں کہ میں نے حضرت فاطمہ بنت علی رضی اللہ عنہ سے پوچھا کہ کیا آپ حالت حیض کی نمازوں کی قضا کرتی ہیں ؟ انہوں نے فرمایا نہیں۔

ابراہیم فرماتے ہیں کہ اگر کوئی حائضہ آیت سجدہ سنے تو پاک ہونے کے بعد بھی اس پر سجدہ لازم نہیں کیونکہ وہ نماز کی قضا بھی تو نہیں کرتی۔