مصنف ابن ابي شيبه

حضرت علی رضی اللہ عنہ بعض اوقات عشاء سے پہلے سوجایا کرتے تھے۔

حضرت ابن حصین فرماتے ہیں کہ حضرت خباب عشاء سے پہلے سوجایا کرتے تھے۔

حضرت ابو حصین فرماتے ہیں کہ حضرت ابو وائل اور حضرت عبد اللہ کے شاگرد عشاء سے پہلے سوجایا کرتے تھے۔

ابراہیم فرماتے ہیں کہ حضرت اسود رمضان میں نماز پڑھنے کے بعد افطار کرتے تھے اور مغرب اور عشاء کے درمیان سویا کرتے تھے۔

ایوب کہتے ہیں کہ میں نے حضرت نافع سے پوچھا کہ کیا حضرت ابن عمر رضی اللہ عنہما عشاء کی نماز سے پہلے سو جاتے تھے ؟ انہوں نے فرمایا کہ وہ سو جاتے تھے لیکن کسی کو مقرر کرتے تھے کہ انہیں جگا دے۔

حضرت ہشام فرماتے ہیں کہ حضرت عروہ عشاء سے پہلے سوجایا کرتے تھے۔

حضرت مجاہد فرماتے ہیں کہ حضرت علی رضی اللہ عنہازدی رمضان کی ہر رات میں ایک قرآن مجید ختم کیا کرتے تھے اور مغرب اور عشاء کے درمیان سویا کرتے تھے۔

حضرت حکم فرماتے ہیں کہ اسلاف عشاء کی نماز سے پہلے کچھ دیر سو جایا کرتے تھے۔

حضرت وقاء فرماتے ہیں کہ رمضان میں حضرت سعید بن جبیر عشاء کی نماز سے پہلے سو جاتے پھر اٹھتے تھے۔

حضرت ہشام فرماتے ہیں کہ محمد عشاء کی نماز سے پہلے سویا کرتے تھے۔