مصنف ابن ابي شيبه

حضرت ابو صالح فرماتے ہیں کہ نبی صلی اللہ علیہ وآلہ وسلم نے ارشاد فرمایا کہ ظہر سے پہلے کی چار رکعتیں تہجد کے برابر ہیں۔

حضرت مسیب بن رافع کہتے ہیں کہ حضرت ابو ایوب انصاری نے عرض کیا کہ ظہر سے پہلے جن چار رکعتوں کو آپ باقاعدگی سے ادا فرماتے ہیں وہ کیا ہیں ؟ حضور صلی اللہ علیہ وآلہ وسلم نے فرمایا کہ زوال شمس کے وقت جنت کے دروازے کھولے جاتے ہیں اور اس وقت تک بند نہیں ہوتے جب تک نماز نہ پڑھ لی جائے، میری خواہش یہ ہے کہ سب سے پہلے میری نماز پیش ہو۔

ایک اور سند سے یونہی منقول ہے۔

حضرت عبد اللہ بن عتبہ فرماتے ہیں کہ میں نے حضرت عمر کے ساتھ ان کے کمرے میں ظہر سے پہلے چار رکعتیں پڑھی ہیں۔

حضرت عمرو بن میمون فرماتے ہیں کہ صحابہ کرام ظہر سے پہلے کی چار رکعتیں اور فجر سے پہلے کی دو رکعتیں کسی حال میں نہ چھوڑتے تھے۔

حضرت عبداللہ فرماتے ہیں کہ ظہر کی چار رکعتوں کے درمیان میں سلام نہیں پھیرے گا البتہ تشہد پڑھے گا۔

حضرت عبد اللہ بن عتبہ فرماتے ہیں کہ میں نے حضرت عمر کو ظہر سے پہلے چار رکعات ادا کرتے دیکھا ہے۔

حضرت ابن ابی نمر فرماتے ہیں کہ حضرت سعید بن مسیب ظہر سے پہلے چار رکعات ادا فرمایا کرتے تھے۔

ایک انصاری شیخ اپنے والد سے روایت کرتے ہیں کہ رسول اللہ صلی اللہ علیہ وآلہ وسلم نے ارشاد فرمایا کہ ظہر سے پہلے چار رکعتوں کا ثواب اسماعیل کی اولاد میں سے ایک غلام آزاد کرنے کے برابر ہے۔

حضرت سالم فرماتے ہیں کہ حضرت ابن عمر رضی اللہ عنہما ظہر سے پہلے چار رکعتیں پڑھا کرتے تھے۔

حضرت سعید بن جبیر ظہر سے پہلے چار رکعتیں پڑھا کرتے تھے۔

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وآلہ وسلم ظہر سے پہلے چار رکعتیں پڑھا کرتے تھے۔