مصنف ابن ابي شيبه

حضرت مسروق فرماتے ہیں کہ قرآن مجید میں بارہ مقامات پر اسلاف سجدہ کیا کرتے تھے۔ انہوں نے اس میں سورة الانشقاق کا ذکر نہ کیا۔

حضرت مسلم فرماتے ہیں کہ حضرت مسروق نے میرے سامنے قرآن میدف کے بارہ سجدوں کو گنوایا اور اس میں سورة الانشقاق کا ذکرنہ کیا۔

حضرت ابن عباس رضی اللہ عنہما نے قرآن مجید کے سجدوں کا ذکر کیا اور ان سورتوں کا نام لیا : سورة الاعراف، سورة الرعد، سورة النحل، سورة بنی اسرائیل، سورة مریم، سورة الحج کا ایک سجدہ، سورة النمل، سورة الفرقان، سورة الم تنزیل، سورة حم تنزیل، سورة ص ۔ اور فرمایا کہ مفصل میں سجدے نہیں ہیں۔

ابراہیم فرماتے ہیں کہ حضرت عبد اللہ بن مسعود رضی اللہ عنہ سورة الاعراف، سورة بنی اسرائیل، سورة النجم، سورة العلق اور سورة الانشقاق میں سجدہ کیا کرتے تھے۔

حضرت عبید بن عمیر فرماتے ہیں کہ اہم سجدے یہ ہیں : سورة الم تنزیل، سورة حم تنزیل، سورة الاعراف اور سورۃ بنی اسرائیل

حضرت علی رضی اللہ عنہ فرماتے ہیں کہ قرآن مجید کے اہم سجدے یہ ہیں : سورة الم تنزیل السجدۃ، حم تنزیل السجدۃ، سورة والنجم، سورة العلق۔

حضرت سعید بن جبیر فرماتے ہیں کہ قرآن مجید کے اہم سجدے یہ ہیں : سورة الم تنزیل، سورة والنجم اور سورة العلق۔

حضرت ابو تمیمہ ہجیمی فرماتے ہیں کہ بنو ہجیم کے کچھ لوگوں نے اپنے ایک سوار کو مکہ اور مدینہ کی طرف روانہ کیا تاکہ وہاں کے لوگوں سے قرآن مجید کے سجدوں کے بارے میں سوال کرے، جب وہ واپس آیا تو اس نے بتایا کہ ان کا دس سجدوں پر اتفاق ہے۔