مصنف ابن ابي شيبه

عیسیٰ بن ابی طلحہ کہتے ہیں کہ ہم حضرت معاویہ کی خدمت میں حاضر تھے کہ اتنے میں موذن آیا اور اس نے اللَّہُ أَکْبَرُ ، اللَّہُ أَکْبَرُ کہا۔ حضرت معاویہ نے جواب میں یونہی کہا۔ پھر اس نے أَشْہَدُ أَنْ لاَ إِلَہَ إِلاَّ اللَّہُ کہا تو حضرت معاویہ نے بھی یونہی کہا۔ پھر اس نے أَشْہَدُ أَنَّ مُحَمَّدًا رَسُولُ اللہِ کہا تو حضرت معاویہ نے بھی یونہی کہا۔ پھر فرمایا کہ میں نے تمہارے نبی صلی اللہ علیہ وآلہ وسلم کو بھی یونہی فرماتے سنا تھا۔

حضرت عبداللہ بن عمرو سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جب تم موذن کو سنو تو وہی کہو جو وہ کہتا ہے۔

حضرت ابو سعید خدری سے روایت ہے کہ رسول اللہ صلی اللہ علیہ وآلہ وسلم وہی کلمات کہا کرتے تھے جو موذن کہتا ہے۔

حضرت ام حبیبہ سے بھی یونہی منقول ہے۔

حضرت ام حبیبہ فرماتی ہیں کہ رسول اللہ صلی اللہ علیہ وآلہ وسلم جب مؤذن کی آواز سنتے تو وہی کلمات کہا کرتے تھے جو مؤذن کہتا ہے یہاں تک کہ وہ خاموش ہوجائے۔

حضرت عبداللہ بن حارث فرماتے ہیں کہ رسول اللہ صلی اللہ علیہ وآلہ وسلم وہی کلمات کہا کرتے تھے جو مؤذن کہتا ہے، البتہ حَیَّ عَلَی الصَّلاَۃِ اور حَیَّ عَلَی الْفَلاَحِ کی جگہ لاَ حَوْلَ وَلاَ قُوَّۃَ إِلاَّ بِاللَّہِ کہا کرتے تھے۔

حضرت ابو جعفر محمد بن علی رضی اللہ عنہ کہتے ہیں کہ حضور صلی اللہ علیہ وآلہ وسلم جب مؤذن کی آواز سنتے تو أَشْہَدُ أَنْ لاَ إلَہَ إِلاَّ اللَّہُ اور أَشْہَدُ أَنَّ مُحَمَّدًا رَسُولُ اللہِ کے جواب میں وانا، وانا کہا کرتے تھے۔

حضرت عروہ فرماتے ہیں کہ حضور صلی اللہ علیہ وآلہ وسلم موذن کی آواز سن کر وَأَنَا ، وَأَنَا کہا کرتے تھے۔

حضرت اوزاعی کہتے ہیں کہ حضرت مجاہد جب حَیَّ عَلَی الصَّلاَۃِ سنتے تو الْمُسْتَعَانُ اللَّہُ (مدد تو اللہ سے طلب کی جاتی ہے) کہتے اور جب موذن حَیَّ عَلَی الْفَلاَحِ کہتا تو لاَ حَوْلَ وَلاَ قُوَّۃَ إِلاَّ بِاللَّہِ کہا کرتے تھے۔

ابراہیم فرماتے ہیں کہ جس نے وہ کلمات کہے جو موذن کہتا ہے تو اس کے لیے موذن کے برابر اجر ہے۔

حسن فرماتے ہیں کہ جب تم موذن کی آواز سنو تو وہی کلمات کہو جو موذن کہتا ہے، البتہ جب وہ حَیَّ عَلَی الصَّلاَۃِ کہے تو تم لاَ حَوْلَ وَلاَ قُوَّۃَ إِلاَّ بِاللَّہِ کہو۔ جب وہ قَدْ قَامَتِ الصَّلاَۃُ کہے تو تم یہ کلمات کہو : اے اللہ ! اے اس مکمل دعوت اور اس کے بعد کھڑی ہونے والی نماز کے رب ! محمد (صلی اللہ علیہ وآلہ وسلم) کو قیامت کے دن وہ چیز عطا فرما جو انہوں نے تجھ سے مانگی ہے۔ جو شخص بھی اقامت کے وقت یہ دعا مانگے گا اللہ قیامت کے دن اسے حضور صلی اللہ علیہ وآلہ وسلم کی شفاعت میں داخل فرمائیں گے۔

حضرت قتادہ فرماتے ہیں حضرت عثمان جب موذن کی آواز سنتے تو تشھد اور تکبیر میں وہی کلمات کہتے جو موذن کہتا ہے البتہ جب وہ حَیَّ عَلَی الصَّلاَۃِ کہتا تو وہ مَا شَائَ اللَّہُ ، وَلاَ حَوْلَ وَلاَ قُوَّۃَ إِلاَّ بِاللَّہِ کہتے اور جب وہ قَدْ قَامَتِ الصَّلاَۃُ کہتا تو آپ یہ کلمات کہتے : عدل اور سچائی کی بات کرنے والوں کو خوش آمدید اور نماز کو خوش آمدید پھر نماز کے لیے اٹھتے۔

حضرت عبداللہ بن شقیق فرماتے ہیں کہ دل کی سختی کی علامت ہے کہ تم موذن کو لاَ إلَہَ إِلاَّ اللَّہُ ، وَاللَّہُ أَکْبَرُ کہتے سنو لیکن اس کا جواب نہ دو ۔

حضرت عبداللہ فرماتے ہیں کہ دل کی سختی کی علامت یہ ہے کہ تم موذن کی آواز سنو پھر وہ کلمات نہ کہو جو وہ کہتا ہے۔