مصنف ابن ابي شيبه

حسن اس شخص کے بارے میں جسے بیٹھے بیٹھے بےہوشی طاری ہوجائے فرماتے ہیں کہ وہ وضو کرے گا۔

ابراہیم فرماتے ہیں کہ جب اسے افاقہ ہو تو وہ وضو کرے۔

حضرت عبیداللہ بن عبداللہ کہتے ہیں کہ میں حضرت عائشہ رضی اللہ عنہا کی خدمت میں حاضر ہوا اور میں نے عرض کیا کہ مجھے رسول اللہ صلی اللہ علیہ وآلہ وسلم کے مرض الوفات کے بارے میں بتائیے۔ حضرت عائشہ رضی اللہ عنہا نے فرمایا کہ رسول اللہ صلی اللہ علیہ وآلہ وسلم کو مرض لاحق ہوا تو آپ کی طبیعت بہت بوجھل ہوگئی، پھر آپ پر بےہوشی طاری ہوگئی، جب افاقہ ہوا تو آپ نے فرمایا کہ میرے لئے بڑے برتن میں پانی رکھو۔ چناچہ ہم نے اس میں پانی رکھا اور آپ نے غسل فرمایا۔ آپ بڑی مشکل سے اٹھے، پھر آپ پر بےہوشی طاری ہوگئی، جب افاقہ ہوا تو آپ نے فرمایا کہ میرے لئے بڑے برتن میں پانی رکھو، ہم نے ایسا ہی کیا۔ آپ نے پھر غسل کیا اور بڑی مشکل سے اٹھے، آپ پر پھر بےہوشی طاری ہوگئی۔ پھر افاقہ ہوا تو آپ نے فرمایا کہ میرے لئے پانی رکھو۔ چناچہ آپ نے پھر غسل فرمایا اور ایسا کئی مرتبہ کیا۔