مصنف ابن ابي شيبه

حضرت جبیر بن مطعم فرماتے ہیں کہ نبی کریم صلی اللہ علیہ وآلہ وسلم کے پاس کچھ لوگوں کا غسل جنابت کے بارے میں اختلاف ہوگیا۔ ایک آدمی نے کہا کہ میں اپنے سر کو اتنا اتنا دھوتا ہوں حضور صلی اللہ علیہ وآلہ وسلم نے فرمایا کہ میں اپنے سر پر تین ہتھیلی پانی ڈالتا ہوں۔

حضرت ابوہریرہ سے کسی نے پوچھا کہ اگر میں نے حال جنابت کا غسل کرنا ہو تو میں اپنے سر پر کتنا پانی ڈالوں ؟ انہوں نے فرمایا کہ نبی کریم صلی اللہ علیہ وآلہ وسلم اپنے سر مبارک پر تین ہتھیلیاں پانی ڈالا کرتے تھے۔ اس نے کہا کہ میرے بال لمبے ہیں۔ حضرت ابوہریرہ نے فرمایا حضور صلی اللہ علیہ وآلہ وسلم کے بال تم سے زیادہ لمبے اور اچھے تھے۔

حضرت جابر فرماتے ہیں کہ میں نے عرض کیا یا رسول اللہ ! ہمارا علاقہ ٹھنڈا ہے، ہم غسل جنابت کیسے کریں ؟ آپ نے فرمایا میں تو اپنے سر پر تین مرتبہ پانی بہاتا ہوں۔

حضرت عائشہ رضی اللہ عنہا فرماتی ہیں کہ حضور صلی اللہ علیہ وآلہ وسلم نے غسل جنابت فرماتے ہوئے اپنے سر پر تین مرتبہ پانی بہایا۔

حضرت عمر فرماتے ہیں کہ میں اپنے سر پر تین مرتبہ پانی بہاتا ہوں۔

حضرت ابن عباس رضی اللہ عنہما فرماتے ہیں کہ جنبی اپنے سر پر تین مرتبہ پانی بہائے گا۔

حضرت جابر فرماتے ہیں کہ جنبی اپنے سر پر تین مرتبہ پانی بہائے گا۔

حضرت علی رضی اللہ عنہ غسل جنابت کرتے ہوئے سر کو دومرتبہ دھوتے تھے۔

حسن فرماتے ہیں کہ ایک مرتبہ طائف کے لوگوں نے حضور صلی اللہ علیہ وآلہ وسلم سے عرض کیا کہ ہمارا علاقہ ٹھنڈا ہے۔ ہم غسل جنابت کیسے کریں ؟ حضور صلی اللہ علیہ وآلہ وسلم نے فرمایا ” میں تو سر پر تین مرتبہ پانی ڈالتا ہوں “۔

حضرت ام ھانی فرماتی ہیں کہ جب تم غسل جنابت کرو تو اپنے ہر عضو کو تین تین مرتبہ دھوؤ۔

ایک آدمی نے حضرت ابو سعید سے غسل کے بارے میں سوال کیا تو آپ نے فرمایا کہ اعضاء کو تین تین مرتبہ دھوؤ۔ اس نے کہا میرے بال زیادہ ہیں حضرت سعید نے فرمایا ” حضور صلی اللہ علیہ وآلہ وسلم کے بال تم سے زیادہ اور اچھے تھے “۔